وزیر اعلیٰ بلوچستان جام کمال خان نے کہا ہے کہ موجودہ صورتحال میں مکمل لاک ڈاؤن کا خدشہ نظر آرہا ہے۔

تفصیلات کے مطابق وزیر اعلیٰ بلوچستان جام کمال خان نے کورونا وائرس کی تیسری لہر سے پیدا ہونے والی صورتحال پر بیان کرتے ہوئے کہا کہ کووڈ 19 کی تیسری لہر کافی شدید اور خطرناک ہے۔

جام کمال نے کہا کہ کورونا کی تیسری لہر نے پوری دنیا کو اپنی لپیٹ میں لے رکھا ہے، عوام نے احتیاط نہ کی تو بھارت جیسے حالات پیدا ہو جائیں گے۔

وزیر اعلیٰ بلوچستان کا کہنا تھا کہ بے احتیاطی کے باعث صوبے میں کورونا کے مثبت کیسز میں تیزی سے اضافہ ہو رہا ہے ،موجودہ صورتحال بہت نازک ہے ہمیں اسے بالکل آسان نہیں لینا چاہئیے۔

انہوں نے کہا کہ عوام میں نہ خوف ہے اور نہ ہی احتیاط کر رہے ہیں، حکومت اب سخت اقدامات کرے گی۔

جام کمال نے یہ بھی کہا کہ اگر عوام نے ایس او پیز پر عمل نہیں کیا تو کارروائی کی جائے گی۔

وزیر اعلیٰ بلوچستان کا کہنا تھا کہ لاک ڈاؤن اور اس کے سنگین معاشی نتائج سے بچنے کے لئے احتیاطی تدابیر اختیار کرنی ہوں گی۔

وزیر اعلیٰ بلوچستان جام کمال خان نے مزید کہا کہ تمام کمشنروں اور ڈپٹی کمشنرز کو ایس او پیز پر عملدر آمد کو یقینی بنانے کی ہدایت کی گئی ہے جبکہ ماسک نہ پہننے اور سماجی فاصلہ برقرار نہ رکھنے پر سخت کارروائی عمل میں لائی جائے گی۔