چیئرمین سی پیک اتھارٹی عاصم سلیم باجوہ نے کہا ہے کہ انشاءاللہ سی پیک کے تمام منصوبے بروقت مکمل ہونگے۔

تفصیلات کے مطابق گورنر پنجاب چوہدری محمد سرور سے چیئرمین سی پیک اتھارٹی عاصم سلیم باجوہ کی ملاقات ہوئی جس میں سی پیک کے جاری منصوبوں سمیت دیگر امور پر بات چیت کی گئی۔

 ملاقات میں چوہدری محمد سرور نے عاصم سلیم باجوہ کے ملکی معاشی ترقی اور سی پیک میں کردار کو سراہا۔

اس موقع پر گورنر پنجاب چوہدری محمد سرور نے کہا کہ چین اور پاکستان میں آج چٹان سے مضبوط دوستی ہے۔

 گورنر پنجاب نے کہا کہ سی پیک پاکستان کے روشن مستقل کی ضمانت ہے، پاک چین دوستی کے مظہر اس منصوبے کو ہر حال میں پایہ تکمیل تک پہنچائیں گے۔

چوہدری محمد سرور نے یہ بھی کہا کہ سی پیک پاکستان کی تقدیر بدلنے کے لیے اہم منصوبہ ہے، پاکستانی حکومت اور عوام کی سی پیک کو دلی حمایت حاصل ہے۔

گورنر پنجاب چوہدری محمد سرور نے مزید کہا کہ سی پیک کی تعمیر کے مسلسل مثبت نتائج سامنے آرہے ہیں، وزیراعظم عمران خان کی قیادت پر میں پاکستان درست سمت میں آگے بڑھ رہا ہے۔

عاصم سلیم باجوہ نے کہا کہ سی پیک سے ملک میں معاشی ترقی کےساتھ روزگار میں بھی اضافہ ہو رہا ہے، پورے ملک میں سی پیک کے منصوبوں پر تیزی سے کام جاری ہے۔

چیئرمین سی پیک اتھارٹی عاصم سلیم باجوہ نے مزید کہا کہ سی پیک منصوبہ پاکستان اور چین کے درمیان تعاون کا پائلٹ پراجیکٹ ہے، انشاءاللہ سی پیک کے تمام منصوبے بروقت مکمل ہونگے۔