تہران میں عالمی ادارہ صحت کے سربراہ ڈاکٹر سید جعفر حسین نے پاکستان ایمبیسی تہران میں وزیر خارجہ شاہ محمود قریشی سے ملاقات کی ہے۔

دوران ملاقات کورونا عالمی وبائی چیلنج سمیت باہمی دلچسپی کے مختلف امور پر تبادلہ خیال کیا گیا ہے۔

شاہ محمود قریشی نے کہا کہ کورونا عالمی وبائی چیلنج سے نبرد آزما ہونے کے لئے عالمی سطح پر مشترکہ لائحہ عمل اختیار کرنے کی ضرورت ہے۔

انہوں نے کہا کہ کورونا وباء کے پھیلاؤ کو روکنے کے لئے عالمی ادارہ صحت کی خدمات قابل تحسین ہیں۔

وزیر خارجہ نے یہ بھی کہا کہ محدود وسائل کے باوجود کورونا وباء کے پھیلاؤ کو روکنے کے لئے اسمارٹ لاک ڈاؤن  سمیت مؤثر حکمت عملی اپنا رہے ہیں۔

 شاہ محمود قریشی کا کہنا تھا کہ کورونا وباء کے دوران عالمی ادارہ صحت کی طرف سے پاکستان کی معاونت کو سراہتے ہیں۔

شاہ محمود قریشی نے کہا کہ ایرانی قیادت کے ساتھ ملاقاتوں میں دیگر امور کے ساتھ ساتھ کورونا وباء سے بچاؤ کے لئے مشترکہ کاوشوں پر بھی تبادلہ خیال کیا گیا ہے۔

انہوں نے کہا کہ پاکستان میں کورونا سے بچاؤ کے لئے ویکسینیشن کا عمل بتدریج جاری ہے ، پہلے مرحلے میں شعبہ طب سے وابستہ ڈاکٹرز، نرسز اور پیرا میڈیکل اسٹاف کو ویکسین کے ذریعے محفوظ بنا رہے ہیں ۔

تہران میں عالمی ادارہ صحت کے سربراہ ڈاکٹر سید جعفر حسین نے وزیر خارجہ کا شکریہ ادا کیا ہے اور ایران میں کورونا وباء سے نمٹنے کے لئے عالمی ادارہ صحت کی کاوشوں سے آگاہ کیا ہے۔

ملاقات میں ایران میں تعینات پاکستانی سفیر رحیم حیات قریشی بھی موجود تھے۔