لوک گلوکار شوکت علی کے انتقال پر گورنر پنجاب چوہدری محمد سرور ، قمر زمان کائرہ  اور فیاض الحسن چوہان نے اظہار تعزیت کیا۔

تفصیلات کے مطابق گور نر پنجاب چوہدری محمد سرور نے نامور گلوکار شوکت علی کے انتقال پر اظہار تعزیت کرتے ہوئے کہا کہ  مرحوم کی  فن  ثقافت کے لیے خدمات کو ہمیشہ یاد رکھا جائے گا۔

چوہدری محمد سرور نے کہا کہ پاکستان سے شوکت علی کی محبت بھی اپنی مثال آپ ہے اور مرحوم کے ملی نغمے ہمیشہ قوم کے دلوں میں زندہ رہیں گے۔

گورنر پنجاب چوہدری محمد سرور نے مزید کہا کہ لوک گلوکار شوکت علی کے لئے دعا گو ہیں کہ اللہ تعالیٰ ان کو جنت الفردوس میں اعلیٰ مقام عطاء فرمائے۔

دوسری جانب  قمر زمان کائرہ نے بھی معروف لوک گلوکار شوکت علی کے انتقال پر اظہار افسوس کرتے ہوئے کہا کہ شوکت علی کی وفات سے ملک ایک بڑے گلوکار سے محروم ہو گیا ہے۔

قمر زمان کائرہ  نے کہا کہ لوک موسیقی کے لیے شوکت علی کی خدمات ہمشہ یاد رکھی جائیں گی۔

 قمر زمان کائرہ  نے شوکت علی کے اہل خانہ سے اظہار تعزیت کرتے ہوئے کہا کہ مرحوم کی مغفرت اور بلند درجات کیلئے دعا گو ہیں۔

علاوہ ازیں لوک گلوکار شوکت علی کے انتقال پر وزیر جیل خانہ جات پنجاب فیاض الحسن چوہان نے  بھی گلوکار شوکت علی کے انتقال پر اظہارافسوس کرتے ہوئے کہا کہ مرحوم ہمارا  قومی اثاثہ تھے۔

وزیر جیل خانہ جات پنجاب فیاض الحسن چوہان نے مزید کہا کہ میری ہمدردیاں اور دعائیں پسماند گان کے ساتھ ہیں اللہ پاک لواحقین کو صبر و استقامت عطا فرمائے۔