پیپلز پارٹی کے رہنما قمر زمان کائرہ نے کہا ہے کہ پیپلز پارٹی ہمشہ سے مزدوروں کے ساتھ  تھی ، ہے اور  رہے گی۔

تفصیلات کے مطابق پیپلز پارٹی کے رہنما قمر زمان کائرہ نے میڈیا سے گفتگو کرتے ہوئے کہا کہ آج عالمی مزدوروں کا دن ہے ، ساری دنیا میں آج کے دن مزدوروں پر بات ہوتی ہے  کورونا کی وجہ سےریلیاں نہیں نکال سکے ہیں۔

قمر زمان نے کہا کہ کراچی الیکشن کی کامیابی پر پارٹی قیادت سمیت تمام کارکنوں کو مبار کباد دیتا ہوں۔

قمر زمان کا کہنا تھا کہ کورونا ویکسین ابھی تک دس فیصد لوگوں کو بھی نہیں لگ سکی ہے۔

انہوں نے کہا کہ اپوزیشن کی جانب سے غلط دھاندلی کا ڈھونگ رچایا جا رہا ہے۔

قمر زمان نے کہا کہ 276 پولنگ اسٹیشن کے رزلٹ اکٹھے کرنے میں وقت تو لگتا ہے، اگر کوئی جماعت اپنے پاس سے ڈکلیر کر رہی ہے تو وہ کنفرم نہیں ہوتا۔

انہوں نے یہ بھی کہا کہ الیکشن کا اصل رزلٹ ریٹرننگ آفیسر نے دینا ہوتا ہے۔

قمر زمان کا کہنا تھا کہ ہم کہنے کو تو حکومت کے خلاف ہیں مگر حکومت کو گرانا نہیں چاہتے ۔

قمر زمان نے کہا کہ مریم نواز اور شاہد خاقان عباسی سمیت دیگر رہنما کہتے ہیں ہم پنجاب میں تبدیلی نہیں لانا چاہتے مگر  پیپلز پارٹی نے جتنی باتیں کہی ہیں ہم نے ثابت کر کے پی ڈی ایم کو مظبوط کیا ہے۔

قمر زمان کا کہنا تھا کہ ہم  نے نہ پی ڈی ایم چھوڑی ہے اور نہ چھوڑنے والے ہیں ہم نے تو بنائی ہے۔

انہوں نے کہا کہ حالیہ اجلاس میں ہمیں نہیں بلایا گیا جو مناسب نہیں تھا جبکہ ری کاؤنٹنگ ان کا حق ہے وہ الیکشن کمیشن میں درخواست دے سکتے ہیں۔

پیپلز پارٹی کے رہنما قمر زمان کائرہ کا مزید کہنا تھا کہ پیپلز پارٹی کی بنیاد اس ملک میں آئین کی حکمرانی پر ہے جس کو جاری رکھا جائے گا۔