پاکستان شوبز انڈسٹری کے مقبول اداکار اور ماڈل عمران عباس نے ماں کے عالمی دن کے موقع پر بتایا کہ وہ اپنی والدہ کے بغیر کچھ نہیں ہیں۔

عمران عباس نے فوٹو اینڈ ویڈیو شیئرنگ ایپ انسٹاگرام اکاؤنٹ پر ایک خوبصورت تصویر شیئر کی ہے جس میں وہ جُھک کر اپنی والدہ کے قدموں کو چُوم رہے ہیں۔

عمران عباس نے تصویر شیئر کرتے ہوئے کیپشن میں لکھا کہ بےشک! ماں کے قدموں تلے جنت ہے۔

اداکار نے کہا کہ میں اپنی ماں جی کے بغیر کچھ نہیں ہوں اور میں جب تک زندہ ہوں اسی طرح اپنی والدہ کے قدموں کو چُومتا رہوں گا۔

عمران عباس نے مزید کہا کہ میری طرف سے دُنیا بھر کی تمام ماؤں کو مدرز ڈے بہت مبارک ہو۔

واضح رہے کہ پاکستان سمیت دنیا کے کئی ممالک میں ماؤں کو خراج تحسین پیش کرنے کے لیے آج اُن کا عالمی دن منایا جارہا ہے۔

گزشتہ دنوں عمران عباس نے انسٹاگرام پر 50 لاکھ فالوورز کا سنگِ میل عبور کیا ہے۔

اداکار و میزبان عمران عباس نے یہ سنگِ میل عبور کرنے پر خوشی کا اظہار کرتے ہوئے مداحوں کا شکریہ ادا کیا۔

عمران عباس نے اپنی ایک دلکش تصویر شیئر کرتے ہوئے لکھا کہ مجھے اللہ پر اعتقاد اور خود پر بھروسے کے بعد سب سے زیادہ اعتماد اپنے مداحوں پر ہے، جن کی محبتوں کی بدولت آج میں یہاں ہوں۔

اداکار نے لکھا کہ میری اصل طاقت میرے مداح ہیں، اور میں اپنے ہر ایک مداح سے محبت کرتا ہوں، کیونکہ ان سب سے جو پیار ملتا ہے اس سے الگ ہی توانائی ملتی ہے۔

اداکار عمران عباس نے مداحوں کو مخاطب کرتے ہوئے کہا کہ 50 لاکھ فالوورز تک پہنچانے والوں کا شکریہ، آپ سب کیلئے بہت سا پیار۔