اسپیکر قومی اسمبلی اسد قیصر نے کہا ہے کہ پاکستان اور چین کے مابین مفرد نوعیت کے  دوستانہ تعلقات دنیا کے لئے ایک مثال ہیں۔

تفصیلات کے مطابق اسپیکر قومی اسمبلی اسد قیصر نے چین کے سفیر نونگ رونگ سے ملاقات کی ہے۔

ملاقات میں دوطرفہ تعلقات اور اہم علاقائی و عالمی امور سمیت باہمی دلچسپی کے دیگر امور پرتبادلہ خیال کیا گیا ہے۔

اسپیکر قومی اسمبلی نے کہا کہ پاکستان کو چین کے ساتھ اپنی صدا بہار دوستی پر فخر ہے۔

انہوں نے یہ بھی کہا کہ دونوں دوست ممالک میں تعلقات باہمی احترام، اعتماد، مفادات اور اسٹریٹجک شراکت داری پر استور ہیں۔

اسد قیصر کا کہنا تھا کہ پاکستان اور چین کے مابین تعلقات ہر گزرتے دن کے ساتھ مضبوط سے مضبوط تر ہو رہے ہیں اور یہ دونوں ممالک علاقائی و عالمی معاملات پر یکساں موقف بھی رکھتے ہیں۔

اسپیکر اسد قیصر کا کہنا تھا کہ پارلیمان سی پیک کو کامیابی سے ہمکنار کرنے کے لئے اپنا کردار ادا کرتا رہے گا جبکہ پارلیمان کے زیر سرپرستی تمام صوبوں بشمول آزاد کشمیر اور گلگت بلتستان میں سی پیک کی تکمیل کے مرحلے کو تیز کرنے کے لئے سیمینار منعقد کیے جار ہے ہیں۔

انہوں نے کہا کہ ان سیمیناروں میں سی پیک سے متعلقہ اسٹیک ہولڈرز کی شمولیت سے سی پیک  کی افادیت میں گراں قدر اضافہ ہو گا۔

اسد قیصر نے یہ بھی کہا کہ رشکئی اکنامک زون سے پاکستان میں صنعتی شعبے کو فروغ حاصل ہوگا اور رشکئی اکنامک زون منصوبے کی تکمیل سے علاقے میں ترقی و خوشحالی کے ایک نئے دور کا آغاز ہو گا۔

اسپیکر اسد قیصر کا کہنا تھا کہ دونوں ممالک کی پارلیمان کے مابین رابطوں کے فروغ سے دوطرفہ تعلقات کو نئی بلندیوں تک پہنچایا جا سکتا ہے۔

انہوں نے کہا کہ پاکستان کورونا وباء کی روک تھام کے لئے ویکسین کی بروقت فراہمی پر دوست ملک چین کا شکر گزار ہے۔

چینی سفیر نونگ رونگ کا کہنا تھا کہ چین پاکستان کے ساتھ اپنی مثالی دوستی کو قدر کی نگاہ سے دیکھتا ہے جبکہ چین کی خارجہ پالیسی میں پاکستان کے ساتھ دوستی کو کلیدی اہمیت حاصل ہے۔

انہوں نے یہ بھی کہا کہ چین اور پاکستان ایک دوسرے کے ہر دکھ سکھ کے دوست ہیں اور دونوں ممالک نے ہر مشکل وقت میں ایک دوسرے کا ساتھ دیا ہے۔

اسپیکر قومی اسمبلی اسد قیصر نے مزید  کہا کہ چین پاکستان کے ساتھ متفرق شعبہ جات میں تعاون کو مزید وسعت دینے کا خواہان ہے۔