وزیر خارجہ مخدوم شاہ محمود قریشی نے کہا ہے کہ پاکستان میں ٹیکنالوجی کےشعبےمیں سرمایہ کاری کے وسیع مواقع ہیں۔

تفصیلات کے مطابق ہواوے ٹیکنالوجیز کے وائس پریذیڈنٹ (مڈل ایسٹ ریجن) مسٹر سپیس لی کی قیادت میں ہواوے ٹیکنالوجیز کے وفد نے وزارتِ خارجہ میں وزیر خارجہ مخدوم شاہ محمود قریشی سے ملاقات کی ہے۔

ملاقات میں وفد نے وزیر خارجہ کو ہواوے ٹیکنالوجیز کی جانب سے پاکستان میں جاری مختلف منصوبوں اور سرمایہ کاری کے حوالے سے بریفنگ دی۔

اس موقع پر وزیر خارجہ مخدوم شاہ محمود قریشی نے نوجوانوں کو جدید ٹیکنالوجیز سے آراستہ کرنے کے حوالے سے ہواوے ٹیکنالوجیز کے جذبے کی تعریف کی۔

شاہ محمود قریشی نے کہا کہ ہم اقتصادی سفارت کاری کے تحت دنیا کی توجہ پاکستان میں سرمایہ کاری کے میسر مواقعوں کی طرف مبذول کروا رہے ہیں۔

وزیر خارجہ مخدوم شاہ محمود قریشی نے مزید کہا کہ پاکستان میں ٹیکنالوجی کےشعبےمیں سرمایہ کاری کے وسیع مواقع ہیں، آئی ٹی کو بروئے کار لا کر شفافیت اور بہتر گورننس کو یقینی بنایا جا سکتا ہے۔

وفد کے دیگر اراکین میں ڈپٹی سی ای او ہوا وے پاکستان ،مسٹر وہان اور ڈائریکٹر پبلک ریلیشنز ہواوے ٹیکنالوجیز احمد جہانزیب ملک شامل تھے جبکہ وفاقی پارلیمانی سیکرٹری خزانہ مخدوم زادہ زین قریشی بھی اس موقع پر موجود تھے۔