وزیر اعلیٰ پنجاب سردار عثمان بزدار نے کہا ہے کہ مہنگائی کے تناسب سے تنخواہوں میں اضافہ ملازمین کی ضرورت ہے۔

تفصیلات کے مطابق وزیراعلیٰ پنجاب کی زیر صدارت تنخواہوں میں فرق دور کرنے کے لئےکمیٹی کا اجلاس ہوا جس میں کمیٹی نے وزیر اعلیٰ کو سفارشات اور تجاویز پیش کیں۔

اجلاس میں سرکاری ملازمین کی تنخواہوں میں تفاوت دور کرنے کیلئے وزیراعلیٰ پنجاب نے قابل تحسین فیصلہ کرتے ہوئے تنخواہوں میں اضافے کی منظوری دی۔

اجلاس میں محکموں کی غیر ضروری آسامیوں کو ختم کرنے پر غور کیا گیا۔

وزیر اعلیٰ پنجاب سردار عثمان بزدار نے اجلاس کی صدارت کرتے ہوئے کہا کہ چھوٹے سرکاری ملازمین کے معاشی مسائل ترجیحی بنیادوں پر حل کریں گے۔

عثمان بزدار نے 15 اور 10 فیصد اسپیشل الاؤنس کی تجاویز مسترد کرتے ہوئے ہدایات جاری کیں کہ سرکاری ملازمین کو 25 فیصد اسپیشل الاؤنس دیا جائے۔

وزیر اعلیٰ پنجاب کی ہدایت پر گریڈ 1 سے 19 تک 7 لاکھ 21 ہزار سے زائد صوبائی ملازمین کو اسپیشل الاؤنس دیا جائے گا۔

عثمان بزدار نے کہا کہ پہلے سے اسپیشل ایگزیکٹو الاؤنس لینے والے ملازمین اس سے فائدہ نہیں اٹھا سکیں گے۔ آئندہ ماہ جون میں اسپیشل الاؤنس تنخواہوں میں شامل کر دیا جائے گا۔

وزیر اعلیٰ پنجاب سردار عثمان بزدار نے مزید کہا کہ سرکاری ملازم ہمارے دست و بازو ہیں، ان کے مسائل کا احساس ہے۔ بجٹ میں بھی صوبائی ملازمین کے لئے خوشخبری ہوگی۔

اجلاس میں صوبائی وزرا راجہ محمد بشارت، میاں محمد اسلم اقبال، ہاشم جواں بخت، سید حسین جہانیاں گردیزی، پرنسپل سیکرٹری وزیراعلیٰ، ایڈیشنل چیف سیکرٹری، سیکرٹری فنانس اور دیگر حکام نے شرکت کی۔