وزیر اعلیٰ خیبر پختونخوا محمود خان نے اچانک صوبائی دارالحکومت پشاور کے مختلف علاقوں کا دورہ کیا ہے۔

تفصیلات کے مطابق  وزیر اعلیٰ  خیبر پختونخوا محمود خان نے بغیر سکیورٹی پروٹوکول کے یونیورسٹی روڈ، کینٹ ، سٹی اور جی ٹی روڈ  کے علاوہ پبی کا بھی دورہ کیا ہے۔

محمود خان نے کورونا ایس او پیز پر عملدرآمد اور صفائی  کی صورتحال کا جائزہ بھی لیا ہے۔

وزیر اعلیٰ نے بعض مقامات پر کورونا ایس او پیز پر عملدر آمد کی صورتحال پر عدم اطمینان کا اظہار کیا ہے جبکہ  پبی حدود میں جی ٹی روڈ کے اطراف گندگی اور صفائی کی صورتحال پر بھی عدم اطمینان کا اظہار کیا ہے۔

وزیر اعلیٰ خیبر پختونخوا نے ضلعی انتظامیہ اور پولیس کو ایس او پیز پر سختی عملدر آمد یقینی بنانے کی ہدایت کی ہے جبکہ ڈپٹی کمشنر پشاور کو صفائی کی صورتحال فوری بہتر بنانے کی ہدایت  بھی کی ہے۔

محمود خان نے متعلقہ ٹی ایم او کو عید سے پہلے گندگی ٹھکانے لگانے جبکہ جی ٹی روڈ پر گرین بیلٹ کی مخدوش صورتحال کی بحالی کے لئے بھی  اقدامات کی ہدایت کی ہے۔

وزیر اعلیٰ نے  پبی پولیس اسٹیشن کا بھی دورہ کیا ہے جس میں  تھانے کا  ریکارڈ چیک کیا ہے اور  تھانے کے مختلف حصوں کا معائنہ کیا ہے۔

وزیر اعلیٰ خیبر پختونخوا حوالاتیوں سے ملے اور ان سے پولیس کے روئیے  کے بارے میں معلومات حاصل کی ہے۔

محمود خان  کا کہنا تھا کہ عوام کو زیادہ سے زیادہ سہولیات کی فراہمی ہماری اولین ترجیح ہے۔

وزیراعلیٰ نے یہ بھی کہا کہ عوامی خدمات کی فراہمی میں غفلت برتنے والے سرکاری اہلکاروں کے خلاف سخت کارروائی عمل میں لائی جائے گی۔

محمود خان نے کہا کہ بہتر عوامی خدمات کی فراہمی کے لئے انتظامیہ اپنی کارکردگی بہتر بنائے۔

وزیر اعلیٰ خیبر پختونخوا محمود خان کا مزید کہنا تھا کہ ایس او پیز اور حکومتی احکامات کی خلاف ورزی کرنے والوں کے خلاف قانونی کارروائی  میں لائی جائے۔