وزیر خزانہ شوکت ترین نے کہا ہے کہ توانائی کے شعبےکی بہتری حکومت کی اولین ترجیح ہے۔

تفصیلات کے مطابق وزیر خزانہ شوکت ترین نے خطاب کرتے ہوئے کہا کہ معیشت کی بہتری ترقی کی بنیادی سیڑھی ہے۔

شوکت ترین نے کہا کہ زرمبادلہ کے ذخائر میں اضافہ معاشی بہتری کا عکاس ہے۔ کسان دوست پالیسیوں کی وجہ سے زراعت کا شعبہ ترقی کی طرف گامزن ہے۔

وزیر خزانہ نے یہ بھی کہا کہ کورونا وائرس کے باعث معیشت کی بحالی میں مشکلات آئیں، کورونا وائرس کے باوجود ملک میں تعمیراتی شعبےکا فروغ ممکن بنایا گیا۔

شوکت ترین کا کہنا تھا کہ وزیراعظم نے معیشت کی بحالی کے لئے بڑے فیصلے کئے، روپے کی قدر میں اضافے کے لیے ترجیحی اقدامات کئے۔

وزیر خزانہ کا یہ بھی کہنا تھا کہ ملکی پیداواری صلاحیت میں اضافہ معاشی استحکام میں معاون ثابت ہوگا جبکہ توانائی کے شعبےکی بہتری حکومت کی اولین ترجیح ہے۔

شوکت ترین نے کہا کہ پائیدار ترقی کے اہداف کا حصول ہماری ترجیح ہے، اقتصادی بہتری کے لئے معاشی ماہرین سے بھی مشاورت کی گئی۔

وزیر خزانہ شوکت ترین نے مزید کہا کہ تعمیراتی شعبے سے منسلک چالیس سے زائد صنعتوں کو بھی فعال کیا گیا، معیشت میں بہتری کے ساتھ محصولات میں بھی اضافہ ہوا۔