نائب صدر پیپلز پارٹی سینیٹر شیری رحمان نے کہا ہے کہ مودی کی مقبوضہ جموں و کشمیر کو الحاق کرنے کی کوشش ناقابل قبول ہے۔

تفصیلات کےمطابق نائب صدر پیپلز پارٹی سینیٹر شیری رحمان  نے وزیر خارجہ کے بھارتی آئین کے آرٹیکل 370 سے متعلق بیان پر ردعمل دیتے ہوئے کہا کہ وزیر خارجہ 370 کو بھارت کا داخلی معاملہ کیسے قرار دے رہے ہیں؟

 شیری رحمان کا کہنا تھا کہ کشمیر سے متعلق کوئی بھی معاملہ بھارت کا اندرونی معاملہ نہیں ہے۔

انہوں نے کہا کہ اقوام متحدہ کی قراردادوں کے مطابق یہ ایک متنازعہ علاقہ ہے۔

شیری رحمان نے یہ بھی کہا کہ اس طرح کے بیان کو پارلیمنٹ میں واضح کرنا ہوگا۔

شیری رحمان کا کہنا تھا کہ بیک ڈور چینلز فیصلے کرنے کے لئے نہیں بلکہ تنازعہ میں اسٹریٹجک وضاحت کے حصول کے لئے ہوتے ہیں۔

انہوں نے کہا کہ بظاہر ایسا لگتا ہے کہ پی ٹی آئی کی حکومت یا تو کسی الجھن کا شکار ہے یا کسی معاہدے میں ملوث ہیں۔

شیری رحمان نے یہ بھی کہا کہ  آرٹیکل اے -35 کو منسوخ کرنے کہ بعد بھارت مقبوضہ جموں اور کشمیر میں آبادیاتی تبدیلی کر سکے گا ،جو آرٹکیل 370 سے منسلک ہے ۔

نائب صدر پیپلز پارٹی سینیٹر شیری رحمان نے مزید کہا کہ دونوں ہی صورتحال کشمیر اور پاکستان کے عوام کے لئے مکمل طور پر ناقابل قبول ہیں ،امن کے شرائط منصفانہ ہونے چاہئیے۔