مسلم لیگ ن کے صدر شہباز شریف نے کہا ہے کہ نااہلی، ہوس اور بےحسی مل کر پاکستان کو شدید نقصان پہنچا رہی ہے۔

تفصیلات کے مطابق مسلم لیگ ن کے صدر شہباز شریف نے ارکان پارلیمان ٹکٹ ہولڈرز سے ملاقات میں گفتگو کرتے ہوئے کہا کہ قوم نے رمضان مہنگائی، کورونا  اور بےروزگاری کے سبب اذیت میں گزارا ہے۔

شہباز شریف کا کہنا تھا کہ حکمرانوں کی بےحسی نے تاریخ کے تمام ریکارڈ توڑ دیئے ہیں جبکہ دعوؤں کے بجائے کاش حکمران ریاست مدینہ والا طرز عمل اپناتے۔

مسلم لیگ ن کے صدر کا کہنا تھا  کہ حکومت نے کم آمدن والے اور نادار طبقات کی زندگی جہنم بنا دی ہے۔

انہوں نے یہ بھی کہا کہ مہنگائی بالخصوص اشیائے خورونوش کی قیمتوں میں مزید اضافہ ہو رہا ہے، اپنےحلقوں میں نادار اور کمزور طبقات کا خیال رکھیں۔

شہباز شریف نے کہا کہ کورونا سےعوام کے بچاؤ کے لئے اپنی سطح پر بھرپور کردار ادا کریں۔

شہبازشریف نے ارکان پارلیمان سے ملکی صورتحال اور تنظیمی امور پر تبادلہ خیال کیا ہے۔

شہبازشریف نے پارٹی رہنماؤں، کارکنان کے جذبے اور نظریاتی وابستگی کو سراہا ہے۔

پارٹی رہنماؤں نے  شہبازشریف کو رہائی پر مبارک باد بھی دی ہے۔

مسلم لیگ ن کے صدر شہباز شریف نے سیاسی انتقام کے جرأت مندانہ مقابلے پر پارٹی قیادت کو خراج تحسین پیش کیا ہے۔