سترہ مئی سے لاہور پریس کلب میں کورونا ویکسینیشن کیمپ کا آغاز ہو گیا ہے۔

تفصیلات کے مطابق لاہور پریس کلب نے اپنے ممبران اور ان کے اہل خانہ کو کورونا وباء سے محفوظ رکھنے کے لئے ویکسینیشن کروانے کا اہتمام کیا ہے۔

ویکسینیشن کا سلسلہ 17 مئی بروز پیر سے شروع کر دیا جائے گا۔

لاہور پریس کلب میں ویکسینیشن سینٹر کے قیام اور انتظامات کا جائزہ لینے کے لئے کمشنر لاہور کیپٹن عثمان یونس اور محکمہ صحت کے اعلیٰ حکام نے پریس کلب کا دورہ کیا اور یہ طے پایا کہ ویکسینیشن کا عمل 17 مئی سے شروع کر دیا جائے گا جس میں  کلب ممبران ، انکی اہلیہ اور 40 سال سے زائد عمر کے اہل خانہ شریک ہوں گے۔

 صدر لاہور پریس کلب ارشد انصاری اور گورننگ باڈی کے ممبران نے اس بات پر بھی اتفاق رائے کیا کہ ویکسینیشن کے لئے روزانہ کی بنیاد پر رجسٹریشن کروانے کے لئے 16 مئی بروز اتوار سے لاہور پریس کلب میں کاﺅنٹر قائم کر دیا جائے گا اور ہر ممبر ویکسینیشن کے لئے خود اپنے اہل خانہ کو کاﺅنٹر پر رجسٹر کروائے گا۔

لاہور پریس کلب کے صدر ارشد انصاری نے صحافیوں کی ترجیحی بنیادوں پر ویکسینیشن کے اقدام پر وزیراعلیٰ سردارعثمان بزدار کا شکریہ ادا کیا اور کہا کہ صحافی کورونا وباء کے خلاف آگاہی مہم میں فرنٹ لائن سولجر کا کردار ادا کر رہے ہیں۔

وزیراعلیٰ پنجاب نے صحافیوں اور ان کے اہلخانہ کو وباء سے محفوظ رکھنے کے لئے لاہور پریس کلب کی درخواست پر مثبت ردعمل کا اظہار کر کے لائق تحسین اقدام کیے ہیں اور صدر لاہور پریس کلب نے ممبران سے درخواست بھی کی کہ وہ کورونا وہاء سے بچاﺅ کے لئے جلد از جلد اپنی اور اپنے اہل خانہ کی ویکسینیشن کروائیں گے۔

اس موقع پر کمشنر لاہور نے یقین دہانی کروائی کہ لاہور پریس کلب کے تمام ممبران اور انکے اہل خانہ کی مکمل ویکسینیشن تک لاہور پریس کلب ویکسینیشن سینٹر فعال رہے گا۔

اس موقع پر سینئر نائب صدر جاوید فاروقی، سیکرٹری زاہد چوہدری ، جوائنٹ سیکرٹری خواجہ نصیر اور سینئر صحافیوں کی کثیر تعداد بھی موجود تھی۔