ڈپٹی اسپیکر قومی اسمبلی قاسم خان سوری نے کہا ہے کہ پاکستان اسرائیلی مظالم کے خلاف تمام فورمز میں آواز بلند کرے گا۔

تفصیلات کے مطابق ڈپٹی اسپیکر قومی اسمبلی قاسم خان سوری کی پاکستان میں تعینات فلسطین کے سفیر احمد جواد اے رابی سے ملاقات ہوئی جس میں فلسطین کی موجودہ صورتحال پر تبادلہ خیال کیا گیا۔

قاسم خان سوری نے کہا کہ پاکستان کی حکومت اور عوام کو فلسطین کی موجودہ صورتحال پر انتہائی تشویش ہے، پاکستان غزہ میں اسرائیل کی جانب سے مسلسل فضائی حملوں کی سخت ترین الفاظ میں مذمت کرتا ہے۔

ڈپٹی اسپیکر قومی اسمبلی نے یہ بھی کہا کہ اسرائیلی بربریت کے نتیجے میں معصوم فلسطینیوں کی اموات پر دلی صدمہ پہنچا ہے۔

قاسم خان سوری کا کہنا تھا کہ مسجد الاقصیٰ کے تقدس کو پامال کرنے اور معصوم عبادت گزاروں پر کئے گئے حملوں کی شدید مذمت کرتا ہے، پاکستان اسرائیلی مظالم کے خلاف تمام علاقہ اور عالمی فورمز میں آواز بلند کرے گا۔

ڈپٹی اسپیکر قومی اسمبلی کا یہ بھی کہنا تھا کہ پاکستان کی قومی اسمبلی نے 17مئی 2021کو مظلوم فلسطینیوں پر اسرائیلی جارحیت کے خلاف مذمتی قراردار متفقہ طور پر منظور کی ہے، قرادار میں پاکستانی حکومت اور عوام کی جانب سے فلسطینی عوام کے ساتھ مکمل یکجہتی کا اظہار کیا ہے۔

قاسم خان سوری نے کہا کہ وزیراعظم عمران خان نے فلسطین کے معاملے پر ترک صدر، سعودی فرمانروا اور صدر محمود عباس سے ٹیلی فون پر بات کی ہے جبکہ اس سلسلے میں او آئی سی کے رکن ممالک میں اپنے تمام ہم منصبوں کو مراسلہ جات ارسال کئے ہیں۔

ڈپٹی اسپیکر قومی اسمبلی قاسم خان سوری نے مزید کہا کہ وزیرخارجہ نے فلسطین، ترکی،سعودی عرب، مصر،چین ،امریکہ اور سوڈان کے وزرائے خارجہ کے ساتھ پہلے ہی ہمارے اجتماعی ردعمل پر بات چیت کر چکے ہیں جبکہ وزیرخارجہ نے  او آئی سی کے وزراے خارجہ کے ہنگامی اجلاس میں شرکت کی اور فلسطین کا معاملہ پیش کیا۔