امیر جماعت اسلامی کراچی حافظ نعیم الرحمٰن نے کہا ہے کہ امریکہ اسرائیل کی پشت پناہی کر رہا ہے۔

تفصیلات کے مطابق امیر جماعت اسلامی کراچی حافظ نعیم الرحمٰن نے اپنے ایک بیان میں کہا کہ ہمارا قبلہ اول یہودیوں کے قبضے میں ہے ،جس طرح فلسطینیوں پر ظلم ہو رہا ہے اس نے پوری انسانیت کا سر جھکا دیا ہے۔

حافظ نعیم نے کہا کہ فلسطینیوں کو بے دخل کرنے کی کوشش کی گئی ہے اور بستیاں جلا دی گئی ہیں۔

انہوں نے یہ بھی کہا کہ مسجد اقصیٰ پر رمضان المبارک میں حملہ کیا گیا ہے۔

امیر جماعت اسلامی کراچی کا کہنا تھا کہ اس وقت 300 سے زیادہ فلسطینی مسلمان شہید ہو چکے ہیں جن میں 80 بچے بھی شامل ہیں۔

نعیم الرحمٰن نے کہا کہ ہم پر جو حکمران مسلط ہیں وہ اپنی ذمہ داری ادا کرنے پر تیار نہیں ہیں۔

انہوں نے یہ بھی کہا کہ پاکستان میں بھی اسرائیل کو تسلیم کرنے کی آوازیں اُٹھ رہی ہیں جو کہ نہیں ہو سکتا۔

امیر جماعت اسلامی کراچی کا کہنا تھا کہ اسرائیل کو تسلیم نہیں کریں گے، اس وقت پوری دنیا میں مظاہرے ہو رہے ہیں۔

حافظ نعیم نے کہا کہ جن کا انسانیت سے تعلق ہے وہ مظاہروں میں شامل ہورہا ہے۔

انہوں نے یہ بھی کہا کہ 23  مئی کو جماعت اسلامی کی میزبانی میں فلسطین کے حق میں بڑا مارچ کریں گے۔

امیر جماعت اسلامی کراچی کا کہنا تھا کہ فلسطین مارچ شارع فیصل پر ہوگا ،اقلیتی برادری کو بھی دعودت  دی گئی ہے ۔

 انہوں نے کہا کہ مولانا صادق جعفری صاحب اور ان کی ٹیم کی خدمت میں حاضر ہوئے ہیں۔

امیر جماعت اسلامی کراچی حافظ نعیم الرحمٰن نے مزید کہا کہ فیملیز کے ساتھ لوگوں کو بھی دعوت دیں گے کہ فلسطین مارچ میں آئیں۔