وزیر خارجہ شاہ محمود قریشی نے کہا ہے کہ پاکستان فلسطینی عوام سے مکمل اظہارِ یکجہتی کرتا ہے۔

تفصیلات کے مطابق وزیر خارجہ شاہ محمود قریشی نے فلسطین کی تازہ ترین صورتحال پر بلائے گئے او آئی سی کے اجلاس سے ورچوئل خطاب کرتے ہوئے کہا کہ ہنگامی اجلاس طلب کرنے پر او آئی سی کے شکر گزار ہیں۔

وزیر خارجہ نے کہا کہ اسرائیلی فوج نہتے فلسطینیوں کے خلاف جارحیت کر  رہی ہے ، اسرائیلی فوج کا نہتے فلسطینیوں پر ظلم انسانی حقوق کی خلاف ورزی ہے۔

شاہ محمود قریشی نے یہ بھی کہا کہ غزہ پر اسرائیلی بمباری سے بے گناہ فلسطینی شہید ہورہے ہیں،مقبوضہ فلسطینی علاقوں میں اسرائیلی آبادیوں میں توسیع باعث تشویش ہے۔پاکستان فلسطین اور اس کےعوام سے مکمل اظہار یکجہتی کرتا ہے۔

شاہ محمود قریشی کا کہنا تھا کہ پاکستان فلسطینیوں کے حق خود ارادیت کی حمایت کرتا ہے، پاکستان فلسطین کے دو ریاستی حل کی حمایت کرتاہے، او آئی سی اسرائیلی جارحیت رکوانے کے لئے ہر ممکن قدم اٹھائے۔

وزیر خارجہ شاہ محمود قریشی کا مزید کہنا تھا کہ فلسطینیوں پر اسرائیلی جارحیت روکنے کے لئے ہر ممکن قدم اٹھایا جائے،عالمی برادری فلسطینیوں کے خلاف طاقت کا غیر قانونی استعمال رکوائے،غزہ پر بمباری فوری طور پر رکوائی جائے۔