بھارت میں تمام پاکستانی اداکاروں کو کام کرنے پر پابندی عائد کر دی گئی ہے۔

 غیر ملکی خبر رساں ادارے کے مطابق بھارتی سیاست دان راج ٹھاکرے کی پارٹی مہاراشٹر نونیرمن سینا (ایم این ایس )نے کہا ہے کہ پارٹی کسی بھی پاکستانی فنکار کو ہندوستان میں کام نہیں کرنے دے گی۔

ایم این ایس سنیما ونگ کے صدر امیہ کھوکر نے کہا ہے کہ ہم ماہرہ خان یا کسی دوسرے پاکستانی فنکاروں کو یہاں کام کرنے کی اجازت نہیں دیں گے۔

صدر امیہ کھوکر نے اپنے بیان میں مزید کہا کہ مہاراشٹر ہو یا ملک کے کسی بھی حصہ میں ہم ماہرہ خان یا کسی دوسرے پاکستانی فنکاروں کو یہاں کام کرنے کی اجازت نہیں دیں گے۔

اس کے علاوہ ماہرہ خان نے بھارتی مصنف انوپما چوپڑا کو دیے گئے انٹرویو کے دوران اعتراف کیا کہ انہیں بالی ووڈ سے کئی مرتبہ کام کی آفرز ہوئیں۔

اداکارہ  نے بتایا کہ بہترین کانٹینٹ کی وجہ سے وہ چھوڑنا نہیں چاہتی تھیں، لیکن وہ بالی ووڈ میں کام کرنے کے حوالے سے خوفزدہ تھیں اور سوچتی تھیں کہ لوگ کیا سوچیں گے۔

ماہرہ خان نے کہا کہ تاہم اب وہ ایسا نہیں سوچتیں، اب ان کا خیال ہے کہ وہ سیاسی باتوں کے لیے اپنے انتخاب کو پیچھے نہیں چھوڑ سکتیں۔

دوسری جانب ماہرہ خان کی بھارتی تھیٹر ڈرامے یار جولاہے میں بھی کام کرنے سے متعلق خبریں وائرل ہوچکی ہیں۔

واضح رہے ماہرہ خان نے 2017ء میں فلم رئیس میں بالی ووڈ کنگ شاہ رخ خان کی اہلیہ کا کرداربھی نبھایا تھا۔