وزیراعلیٰ پنجاب سردار عثمان بزدار نے کہا ہے کہ پوری دیانتداری سے عوام کی خدمت کر رہے ہیں۔

تفصیلات کے مطابق وزیراعلیٰ پنجاب سردار عثمان بزدار سے پاکستان تحریک انصاف کے رہنما مہدی حسن بھٹی اور رکن قومی اسمبلی شوکت علی بھٹی کی ملاقات ہوئی جس میں حافظ آباد کے ترقیاتی پیکیج پر پیشرفت اور حلقے کے مسائل کے حل کے حوالے سے گفتگو کی گئی۔

عثمان بزدار نے کہا کہ ماضی کی طرح وسائل چند مخصوص شہروں کے لئے مختص نہیں کئے، حافظ آباد سمیت ہر شہر کی ترقی کا عزم کر رکھا ہے۔

وزیراعلیٰ پنجاب نے یہ بھی کہا کہ ترقی پر پہلا حق دور دراز علاقو ں کا ہے۔ پنجاب کی تاریخ میں پہلی بار پسماندہ علاقوں کی جانب وسائل کا رخ موڑا ہے۔

عثمان بزدار کا کہنا تھا کہ حافظ آباد سمیت پنجاب کے بیشتر علاقوں کو ماضی میں بری طرح نظر انداز کیا گیا۔حافظ آباد کے ترقیاتی منصوبوں کو بروقت مکمل کیا جائے گا-

وزیراعلیٰ پنجاب کا یہ بھی کہنا تھا کہ تحریک انصاف کی حکومت نے پہلی مرتبہ پنجاب میں یکساں ترقی کا ویژن دیا، ہم سب شہروں کی یکساں ترقی اور عوام کی خوشحالی کیلئے سرگرم عمل ہیں۔

عثمان بزدار نے کہا کہ ترقی کے سفر میں رکاوٹیں کھڑی کرنے والے عناصر خود انتشار کا شکار ہوچکے ہیں۔ ہر موقع پر ناکامی کے بعد پی ڈی ایم کو منفی سیاست سے توبہ کر لینی چاہیے۔

وزیراعلیٰ پنجاب سردار عثمان بزدار نے مزید کہا کہ وزیراعظم عمران خان نے ہمیشہ اصولوں کی سیاست کی ہے۔ نئے پاکستان میں مفاد پرستوں کے ایجنڈے کی رتی بھر گنجائش نہیں۔