آرمی چیف جنرل قمر جاوید باجوہ کی ریاض میں سعودی مسلح افواج کے چیف آف جنرل اسٹاف سے ملاقات ہوئی ہے۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق اس اہم ملاقات میں خطے کی سیکیورٹی صورتحال اور باہمی دلچسپی کے امور پر تبادلہ خیال کیا گیا ۔

 آئی ایس پی آر کے مطابق افغان امن عمل، پاک سعودیہ دفاع و سیکیورٹی تعاون سے متعلق امور پر بھی بات چیت ہوئی۔

آئی ایس پی آر کے مطابق آرمی چیف جنرل قمر جاوید باجوہ نے دونوں ممالک کی افواج کے درمیان فوجی تعاون کے مزید فروغ کی ضرورت پر زوردیا۔

آرمی چیف نے مزید کہاکہ پاک سعودی تعاون کا خطے کے امن و سیکیورٹی پر مثبت اثر پڑے گا۔

آئی ایس پی آر کے مطابق ملاقات میں سعودی مسلح افواج کے چیف آف جنرل اسٹاف نے علاقائی تعاون، امن اور استحکام کے تمام اقدامات پر سعودی عرب کی جانب سے مکمل تعاون کی یقین دہانی بھی کرائی ہے۔