کراچی میں یوم علی کے سلسلے میں سندھ حکومت نے سیکیورٹی انتظامات کو حتمی شکل دے دی ہے۔

تفصیلات کے مطابق کورونا وائرس کے پھیلاؤ اور اس سے بچاؤ سے متعلق کیے گئے اقدامات پر سندھ حکومت نے کراچی میں جلوسوں کی سیکیورٹی کے لئے فول پروف انتظامات کو حتمی شکل دیدی ہے۔

پولیس حکام نے اپنے بیان میں کہا کہ ہر سال کی طرح سخت انتظامات کیے گئے ہیں، جلوس کے راستوں کو کنٹینرز لگا کر سیل کرنا شروع کردیا ہے۔

پولیس حکام نے کہا کہ جلوس کے راستے میں آنے والی تمام دکانیں اور مارکیٹس بھی سیل کی جارہی ہیں جبکہ پولیس اور رینجرز کی بھاری نفری تعینات رہے گی۔

پولیس حکام نے یہ بھی کہا کہ فضائی نگرانی کے علاوہ اونچی عمارتوں پر ماہر نشانہ باز تعینات کیے جائیں گے۔

 پولیس حکام نے مزید کہا کہ جلوس کے راستوں کی بم ڈسپوزل اسکواڈ کی سوئپنگ کے علاوہ سراغ رساں کتے بھی سوئپنگ کرتے رہیں گے۔

دوسری جانب صوبہ بلوچستان کے دارالحکومت کوئٹہ میں 20 اور 21 رمضان موبائل سروس بند کی جائیگی۔

صوبائی حکومت کی جانب سے جاری کردہ نوٹیفکیشن کے مطابق کوئٹہ میں موبائل نیٹ ورک بند کرنے کا دورانیہ شام 6 بجے سے رات 4 بجے تک ہوگا۔

ذرائع کے مطابق صوبہ بلوچستان کے دارالحکومت کوئٹہ میں موبائل فون سروس ابھی سے بند کردی گئی ہے، موبائل فون سروس بند ہونے سے شہریوں کو مشکلات کا سامنا ہے جبکہ فون سروس کی معطلی محکمہ داخلہ بلوچستان کی درخواست پر ہوئی ہے۔