کراچی میں سپریم کورٹ کے احکامات پر الہ دین پارک ، کے ڈی اے ، فیڈرل بی ایریا بلاک 15 ، گجر اور اورنگی نالے  پر تجاوزات کے خلاف آپریشن کا آج چوتھا روز ہے۔

تفصیلات کے مطابق بلدیہ عظمی کراچی نے کارروائی کا آغاز کردیا ہے جبکہ محکمہ انسداد تجاوزات کے سینئیر ڈائريکٹر بشیر صدیقی آپریشن کی قیادت کررہے ہیں۔

 محکمہ انسداد تجاوزات ضلع شرقی کے افسران و اہلکار بھی کارروائی میں حصہ لے رہے ہیں۔

محکمہ انسداد تجاوزات کو ضلعی انتظامیہ ، رینجرز، پولیس اور سٹی وارڈنز کی معاونت حاصل ہے۔

بشیر صدیقی کا کہنا ہے کہ الہ دین پارک میں قائم شاپنگ مال ، پویلین اینڈ کلب اور فوڈ کمپلیکس کی مسماری کا آغاز کیا جاچکا ہے جبکہ گذشتہ روز کی کارروائی میں شاپنگ مال کا کوریڈور مسمار کردیا گیا تھا۔

ان کا کہنا ہے کہ شاپنگ مال میں قائم مزید دکانوں کو مسمار کیا جارہا ہے  جبکہ پویلین اینڈ کلب کا مرکزی گیٹ ، سیکورٹی چوکی اور دیواریں مسمار کی جا چکی ہیں۔

وہی دوسری جانب کے ڈی اے آفیسرز کلب کشمیر روڈ پر بھی تجاوزات کے خلاف آپریشن جاری ہے۔

کلب میں قائم شادی ہالز مسمار کئے جارہے ہیں جبکہ آفیسرز کلب میں قائم کچن، ڈائننگ ہال اور دیگر تجاوزات بھی منہدم کی جارہی ہیں۔

فیڈرل بی ایریا بلاک 15 میں ایس ٹی 14 پر بھی تجاوزات کے خلاف کارروائی جاری ہے ، وہاں بھی ایس ٹی 14 پر قائم کچے پکے مکانات کو مسمار کیا جارہا ہے۔

اس سے قبل کئی دکانیں، گودام اور دیگر تجاوزات منہدم کی گئی تھیں۔

گجرنالے اور اورنگی نالے کی بحالی کا آپریشن بھی جاری ہے۔

واضح رہے کہ گجر نالہ پر بھی چونا ڈپو، لیاقت آباد اور حاجی مرید گوٹھ کے قریب کارروائیاں جاری ہیں۔

اورنگی نالے  پر بھی تین مختلف مقامات پر تجاوزات کا خاتمہ کردیا گیا ہے۔

بشیر صدیقی کا کہنا ہے کہ تمام آپریشنز کی روزانہ کی بنیاد پر رپورٹ مرتب کی جارہی ہے۔

واضح رہے کہ ہیوی مشینری کے ذریعے مسماری کا کام جاری ہے، غیر قانونی تعمیرات کی مکمل مسماری میں کئی ہفتے لگ سکتے ہیں۔