گرمی کے موسم میں پھل کھانا بہت مفید ہوتا ہے مختلف پھلوں کے مختلف فائدے ہیں ان ہی میں ایک پھل آڑو بھی ہے جو ہماری صحت کو بے شمار فوائد دیتا ہے ،قدرت نے اس پھل میں کتنے فائدے رکھیں ہیں آگے جانتے ہیں۔

آڑو کی تاثیر ٹھنڈی ہوتی ہے جو کہ ہمارے جسم میں گرمی کی شدت کو کم کرتی ہے ،بہت سے فائدوں میں ایک فائدہ یہ ہے کہ اس سے ہماری آنکھوں کی بینائی بہتر ہوتی ہے، آڑو آئرن، میگنیشیم، پوٹاشیم، کاپر، زنک اور مینگنیز سے بھر پور ہوتا ہے۔

ماہرین کا کہنا ہے کہ آنکھوں کی بینائی کو بہتر بنانے کے لئے صرف گاجر ہی نہیں بلکہ آڑو بھی بہت مفید ہے کیونکہ آڑو آنکھوں کو مخصوص غذائی اجزاء فراہم کرنے میں مدد کرتا ہے، آڑو وٹامن اے سے بھرا ہوا ہوتا ہے۔

اس پھل میں قدرتی طور پر خون بنانے کی خصوصیات موجود ہوتی ہیں، آڑو ہمارے جسم میں خون کی پیداوار بڑھاتا ہے اور اس کے ساتھ ہی ہمارے جسم میں موجود آزاد ریڈیکلز سے لڑنے میں مدد کرتا ہے۔

ہم سب جانتے ہیں کہ وٹامن اے ہماری جلد کے لئے بہت فائدے مند ہے یہ ہماری جلد کو بہتر کرتا ہے اور آڑو میں موجود اینٹی آکسیڈینٹس عُمر بڑھنے کے عمل کو بھی سست کرتا ہے لہٰذا موسم گرما میں روزانہ کی بنیاد پر آڑو کو اپنی غذا میں شامل کریں۔