وزیر اعلیٰ پنجاب کے معاون خصوصی سردار تنویر الیاس نے کہا کہ آزاد کشمیر کی سیاست میں مذہبی جماعتوں کا ایک اہم کردار ہے۔

تفصیلات کے مطابق وزیر اعلیٰ پنجاب کے معاون خصوصی سردار تنویر الیاس سے آل جموں کشمیر جمعیت علماء اسلام کے وفد کی ملاقات ہوئی، وفد نے امیر جماعت قاضی محمود الحسن کی قیادت میں ملاقات کی۔

ذرائع کے مطابق آزاد کشمیر میں الیکشن 2021 سیاسی جوڑ توڑ عروج پر ہے، تحریک اانصاف آزاد کشمیر کی کامیابی کی راہ ہموار ہونے لگی ہے، اہم شخصیات کی شمولیت کیساتھ مختلف سیاسی جماعتوں کی غیرمشروط حمایت بھی ملنا شروع ہوگئی ہے۔

واضح رہے کہ پی ٹی آئی اور آل جموں کشمیر جمیعت علماءاسلام نے انتخابی اتحاد کا فیصلہ کیا اور آل جموں کشمیر جمیعت علماءاسلام نے تمام امیدوار پی ٹی آئی امیدواروں کے حق میں بٹھانے کا اعلان کردیا۔

سردار تنویر الیاس کا کہنا ہے کہ جموں کشمیر جمعیت علماء اسلام کا ہر حلقے میں ووٹ بینک موجود ہے ہم جموں کشمیر جمعیت علماء اسلام کے ساتھ ملکر الیکشن لڑیں گے، جموں کشمیر جمعیت علماء اسلام کے قائدین کا اتحاد کرنے پر شکر گزار ہوں۔

انہوں نے یہ بھی کہا کہ عمران خان نے دنیا میں اسلام کا مقدمہ بھرپور انداز میں لڑا، عمران خان اسلام فوبیا کیخلاف توانا آواز بن کر سامنے آئے، عمران خان نے کشمیر اور اسلام کے معاملے پر کبھی سمجھوتہ نہیں کیا۔

دوسری جانب قاضی محمود الحسن اشرف نے کہا کہ آل جموں کشمیر جمعیت علماء اسلام تمام حلقوں میں پی ٹی آئی کو سپورٹ کرے گی، دونوں جماعتوں کے اتحاد سے ریاست میں ساز گار ماحول پیدا ہوگا۔