جنگ و جیو کے مالک میر شکیل کے خلاف غیر قانونی پلاٹ الاٹمنٹ ریفرنس کی سماعت کل ہوگی۔

عدالت نے پراسکیوشن کے گواہ ڈائریکٹر واسا ذیشان بلال کو بیان ریکارڈ کروانے کیلئے طلب کر رکھا ہے۔

ملزم میر شکیل کے خلاف ایک اور اہم گواہ پیش کیا جائے گا جبکہ نیب کے گواہ کی جانب سے مزید سنسنی خیز انکشافات ہونگے۔

ذرائع کے مطابق نیب افسران کیس کو منطقی انجام تک پہنچانے کے لئے پرعزم ہیں، الزام ثابت ہونے پر ملزم میر شکیل کو 14سال قید با مشقت کا سامنا کرنا ہوگا۔

ذرائع کا کہنا ہے کہ احتساب عدالت کے جج اسد علی  ملزم میر شکیل سمیت دیگر کیخلاف غیر قانونی پلاٹ الاٹمنٹ ریفرنس کی سماعت کریں گے۔

ذرائع کا یہ بھی کہنا ہے کہ ملزم میر شکیل اپنے وکیل کے ہمراہ پیش ہوں گے جبکہ شریک ملزم سابق ڈی جی ایل ڈی ہمایوں فیض رسول اور بشیراحمد بھی عدالت پیش ہوں گے۔

ذرائع کا کہنا ہے کہ طلبی کے باوجود پیش نہ ہونے پر شریک ملزم نواز شریف کو اشتہاری قرار دیا جاچکا ہے، نیب ریفرنس میں میر شکیل، سابق ڈی جی ایل ڈی اے ہمایوں فیض رسول اور بشیراحمد کو گنہگار قرار دیا گیا ہے۔

نیب پراسیکیوٹر کا کہنا ہے کہ ملزم میر شکیل نے اس وقت کے وزیراعلیٰ نواز شریف کی ملی بھگت سے 1، 1 کنال کے 54 پلاٹ ایگزمپشن پر حاصل کئے۔

نیب پراسیکیوٹر کا یہ بھی کہنا ہے کہ ملزم کا ایگزمپشن پر ایک ہی علاقے میں پلاٹ حاصل کرنا ایگزمپشن پالیسی 1986 کی خلاف ورزی ہے۔

نیب پراسیکیوٹر کا مزید کہنا ہے کہ ملزم میر شکیل نے نواز شریف کی ملی بھگت سے 2 گلیاں بھی الاٹ شدہ پلاٹوں میں شامل کرلیں، ملزم میر شکیل نے اپنا جرم چھپانے کیلئے پلاٹ اپنی اہلیہ اور کمسن بچوں کے نام پر منتقل کروالئے۔