وزیراعلیٰ خیبرپختونخوا محمود خان نے کہا ہے کہ بجٹ میں ملازمین کی تنخواہوں میں تاریخی اضافہ کیا گیا ہے۔

تفصیلات کے مطابق وزیراعلیٰ خیبرپختونخوا محمود خان نے آئندہ مالی سال کے بجٹ کے حوالے سے بیان میں کہا کہ صوبائی بجٹ برائے مالی سال 2021-22 ایک متوازن ، عوام دوست اور ایک تاریخی بجٹ ہے ، یہ ایک ٹیکس فری بجٹ ہے جس میں کوئی نیا ٹیکس نہیں لگایا گیا۔

محمود خان نے کہا کہ بجٹ میں ترقیاتی منصوبوں کیلئے 370 ارب روپے کی خطیر رقم مختص کی گئی ہےجو مجموعی بجٹ کا 33 فیصد بنتا ہے۔

وزیراعلیٰ خیبرپختونخوا نے یہ بھی کہا کہ آئمہ مساجد کے لئے ماہانہ وظائف بجٹ میں شامل ہیں جبکہ بجٹ میں ملازمین کی تنخواہوں میں بھی تاریخی اضافہ کیا گیا ہے۔

محمود خان کا کہنا تھا کہ نئے بجٹ میں صحت، تعلیم، پینے کے پانی اور دیگر سماجی شعبوں کے بجٹ میں تاریخی اضافہ کیا گیا ہے۔

وزیراعلیٰ خیبرپختونخوا کا یہ بھی کہنا تھا کہ ضم اضلاع کے عوام کیلئے صحت کارڈ پلس اسکیم کی سالانہ کوریج کو  چھ لاکھ روپے سے بڑھا کر 10 لاکھ روپے کر دیا گیا ہے۔

محمود خان نے کہا کہ پچھلے مالی سال کے بجٹ کے مقابلے میں ابتدائی و ثانوی تعلیم کے بجٹ میں 24 ارب روپے ، صحت کے بجٹ میں 22 ارب ، پولیس کے بجٹ میں 12ارب روپے اضافہ کیا ہے۔

وزیراعلیٰ خیبرپختونخوا محمود خان نے مزید کہا کہ سیاحت اور کھیلوں کے بجٹ میں 11 ارب جبکہ بلدیات کے بجٹ میں چھ ارب روپے کا اضافہ کیا گیا ہے۔