وزیراعظم کی معاون خصوصی برائے تخفیف غربت و سماجی تحفظ ثانیہ نشتر نے کہا ہے کہ حکومت پروجیکشن پر غربت کے خاتمے کیلئے کام کررہی ہے۔

تفصیلات کے مطابق وزیراعظم کی معاون خصوصی برائے تخفیف غربت و سماجی تحفظ ثانیہ نشتر نے وزیر خزانہ شوکت ترین کے ہمراہ اقتصادی جائزہ رپورٹ کے اجراء کے موقع پر پریس کانفرنس سے خطاب کرتے ہوئے کہا کہ دو سال پہلے احساس پروگرام کا لائحہ عمل بنا تھا، پہلے سال اس کے ہم نے انتظامی ڈھانچے بنائے اور اس کا انفراسٹرکچر ڈیویلپ کیا۔

وزیراعظم کی معاون خصوصی برائے تخفیف غربت و سماجی تحفظ نے کہا کہ ہم نے کووڈ 19 کے دوران غریب افراد کی مالی معاونت کے ساتھ ساتھ اپنے باقی اہداف پر بھی نظر رکھی ہے ۔

ثانیہ نشتر نے یہ بھی کہا کہ حکومت نے فوری طور پر غریب افراد کی مشکلات کو کم کرنے کے لیے احساس پروگرام کے تحت 15 ملین لوگوں کو 179 ارب روپے کی مالی مدد فراہم کی ۔

وزیراعظم کی معاون خصوصی برائے تخفیف غربت و سماجی تحفظ کا کہنا تھا کہ کووڈ 19 کی عالمی وباء کے باعث 24 ملین افراد جو دہاڑی دار یا عام آدمی تھے، ان کی معیشت کا پہیہ یکایک رک گیا اور وہ مشکلات سے دوچار ہو گئے۔

ثانیہ نشتر کا یہ بھی کہنا تھا کہ ہم نے کووڈ 19 کے دوران اپنے باقی اہداف حاصل نہیں کیے بلکہ بہتر حکمت عملی کے تحت احساس پروگرام کے تمام منصوبوں کو جاری رکھا اور متحرک انداز میں کووڈ 19 کے باعث مالی مشکلات کا شکار افراد کو کیش فراہم کیا۔

وزیراعظم کی معاون خصوصی برائے تخفیف غربت و سماجی تحفظ نے کہا کہ کوشش تھی کہ شفاف، منظم اور غیرجانبدارانہ حکمت عملی کے تحت کام کریں اور بڑی حد تک ہم اس میں کامیاب ہوئے۔

ثانیہ نشتر نے یہ بھی کہا کہ کووڈ 19 کے دوران 50 نشوونما مراکز قائم کئے ہیں، سماجی تحفظ کے تعلیمی وظائف کے نظام کے تحت 50 اضلاع سے اس کا دائرہ کار پورے ملک میں لے جائیں گے۔