معاون خصوصی برائے سیاسی ابلاغ ڈاکٹر شہباز گِل نے کہا ہے کہ بجٹ عوامی ہے اور اسی کی کرپٹ اپوزیشن کو پریشانی ہے۔

تفصیلات کے مطابق معاون خصوصی برائے سیاسی ابلاغ ڈاکٹر شہباز گِل نے مریم اورنگزیب کے بیان پر ردعمل دیتے ہوئے کہا کہ کرپشن کی منڈیاں لگانے والے عدالتوں سے بھاگے اور مفرور ہیں۔

معاون خصوصی برائے سیاسی ابلاغ نے کہا کہ نااہل جانتے ہیں کہ عوام کو ریلیف دینے کا سلسلہ چل پڑا تو انکی سیاست دفن ہو جائے گی۔

ڈاکٹر شہباز گِل نے یہ بھی کہا کہ بجٹ عوامی ہے اور اسی کی کرپٹ اپوزیشن کو پریشانی ہے،عوام فلاحی بجٹ دیکھ کر انہیں سوائے پروپیگنڈے کے کچھ نہیں سوجھ رہا۔

معاون خصوصی برائے سیاسی ابلاغ کا کہنا تھا کہ وزیراعظم کو پہلے دن تقریر اور بجٹ اسپیچ نہ کرنے دینے والوں کو اخلاقیات یاد آئی ہیں۔

ڈاکٹر شہباز گِل کا یہ بھی کہنا تھا کہ جمہوریت کے جعلی علمبرداروں کو آج جمہوری روایات کی یاد ستا رہی ہے، پہلے دن سے ایوان کے وقار کو داؤ پر لگانے والوں کو آج ایوان کی تکریم یاد آئی ہے۔

معاون خصوصی برائے سیاسی ابلاغ ڈاکٹر شہباز گِل کا مزید کہنا تھا کہ نااہلوں کے نزدیک آج بھی جمہوریت وہ ہے جس کا حصہ وہ خود ہوں، جی حضوری اور خوشامد کرکے پارٹی ترجمان بننے والے صرف دوسروں پر انگلیاں اٹھا سکتے ہیں۔