نیم کا درخت اونچا اور گھنا ہوتا ہے اس کے پتے صحت سے متعلق کئی شکایات سے نجات دلاتے ہیں اور اس کے تیل کے استعمال سے بھی بے شمار فوائد حاصل ہوتے ہیں۔

نیم کا درخت ماحولیاتی آلودگی دُور کرتا ہے، جس گھر میں نیم کا درخت ہو وہاں کے مکین وبائی امراض سے خاصی حد تک محفوظ رہتے ہیں۔

[amazonad category=”Auto”]

نیم کے پتے پانی میں اُبال کر نہانے سے جِلدی امراض سے شفا ملتی ہے جبکہ اس کے پتّے جلا کر گھر میں دھونی دینے سے مچھر ختم ہوجاتے ہیں جبکہ ڈینگی اور ملیریا جیسی بیماریوں سے بچنا ممکن ہوتا ہے۔

نیم کی مسواک کا استعمال دانتوں کو کیڑا لگنے سے محفوظ رکھتا ہے۔

نیم کے تیل سے بالوں کی جڑوں میں مساج کرنے سر سے جوؤں اور لیکھوں کا خاتمہ ممکن ہوتا ہے، اگر بال بہت زیادہ جھڑ رہے ہوں تو شیمپو کرنے کے بعد آخر میں نیم کے اُبلے ہوئے ٹھنڈے پانی سے بال دھولیں، نیم کا پانی بھی بالوں کی جڑیں مضبوط کرتا ہے۔

بال لمبے اور گھنے کرنے کے لئے نیم کے تیل میں تھوڑا سا زیتون کا تیل مِکس کرکے بالوں میں لگانے سے بال تیزی سے گھنے اور لمبے ہوتے ہیں ، بالوں کی رونق بحال ہوتی ہے اور روکھا پن ختم ہو جاتا ہے۔

اس کے علاوہ نیم کا تیل بالوں کی خشکی دُور کر کے اِنہیں چمک دار بھی بناتا ہے۔

چہرے کے نکھار کے لیے نیم کے تیل کے ایک سے دو قطرے ہتھیلی میں لیں اور دو سے تین قطرے پانی کے بھی شامل کر کے اس محلول سے چہرے کی مساج کریں، یہ عمل ہر ہفتے میں ایک دن ضرور دہرائیں، چہرے سے داغ، دھبے، جھائیاں، ایکنی اور کیل مہاسوں کی شکایت دور ہو جائے گی۔

حساس اور بلیک ہیڈز والی اسکن کے لئے نیم کا تیل بہترین علاج ہے، نیم کے تیل کے دو تین قطرے پانی میں حل کر کے بلیک ہیڈز پر لگائیں، روزانہ کے استعمال سے بلیک ہیڈز جھڑ جائیں گے اور دوبارہ نہیں ہوں گے۔

اس کے علاوہ پاؤں سے آنے والی بدبو کے خاتمے کے لئے نیم کے تیل سے رات سونے سے قبل مساج کرنے سے حیرت انگیز نتائج حاصل ہوتے ہیں۔