صوبائی وزیر اطلاعات سندھ سید ناصر حسین شاہ نے کہا ہے کہ نالائق اور نااہل وفاقی حکومت کو سندھ کی زراعت اور صنعتوں کی تباہی کی پرواہ نہیں۔

تفصیلات کے مطابق صوبائی وزیر اطلاعات سندھ سید ناصر حسین شاہ نے اپنے ایک بیان میں کہا کہ سندھ میں کئی اضلاع میں پینے کے پانی کی شدت قلت کے باوجود فلڈ کینال کھولے ہوئے ہیں۔

صوبائی وزیر اطلاعات سندھ کا کہنا ہے کہ رینی کینال واپڈا کا پروجیکٹ ہے لیکن رینی کینال کو ابھی تک سندھ حکومت اور محکمہ آبپاشی سندھ کے حوالے نہیں کیا گیا ہے، جس کا ثبوت یہ ہے کہ وفاقی بجٹ میں رینی کینال کے لیے فنڈز رکھے گئے ہیں۔

سید ناصر حسین شاہ کا یہ بھی کہنا ہے کہ پانی چوری کرکے سندھ کی زراعت کو تباہ کیا گیا، کشمور سے کینجھر تک کاشتکار اور کسان سراپا احتجاج ہیں لیکن پی ٹی آئی کی وفاقی حکومت نے ایک نہ سنی۔

صوبائی وزیر اطلاعات سندھ نے کہا کہ ایک کروڑ نوکریاں دینے والوں نے کسانوں اور مزدوروں سے روٹی چھین لی ہے، نالائق اور نااہل وفاقی حکومت کو عوام کی کوئی فکر نہیں ہے یہ اے ٹی ایم بھرنے آئے ہیں۔

سید ناصر حسین شاہ نے یہ بھی کہا کہ اب ملک کی معاشی رگ پر وار کیا گیا ہے اور سندھ کے حصے کی گیس منقطع کر دی گئی ہے، گیس کی بندش سے کراچی میں سینکڑوں کارخانوں کو تالے لگ گئے ہیں۔

صوبائی وزیر اطلاعات سندھ سید ناصر حسین شاہ نے مزید کہا کہ ہزاروں مزدور بے روزگار ہوگئے ہیں اور ملک کی معیشت کو سخت نقصان پہنچایا جارہا ہے لیکن ان کے وزراء ترقی اور معیشت کی بہتری کا راگ الاپتے پھرتے ہیں۔