پاکستان پیپلز پارٹی کے رہنما لطیف کھوسہ نے کہا ہے کہ بلاول بھٹو کی باتیں عوام کے دلوں پر اثر کررہی ہیں۔

تفصیلات کے مطابق پاکستان پیپلز پارٹی کے رہنما لطیف کھوسہ نے سابق گورنر پنجاب سے سکھر میں گفتگو کرتے ہوئے کہا کہ آصف زرداری کے لاہور میں قیام سے پنجاب میں پارٹی مستحکم ہوگی ہے۔

انہوں نے یہ بھی کہا کہ سب سمجھ لیں کہ آئندہ حکومت پیپلزپارٹی کی ہوگی، پنجاب سمیت ملک کے تمام صوبوں میں پی پی حکومت بنائے گی، پنجاب پی پی میں شمولیت کے لیے قطاریں لگ گئی ہیں۔

لطیف کھوسہ نے مزید کہا کہ اسمبلی کے بجٹ اجلاس میں جو ہوا اس سے ملک کی جگ ہنسائی ہوئی ہے، پارلیمنٹیرینز کے رویے سے ہماری بین الاقوامی طور پر بدنامی ہوئی ہے۔

انہوں نے مزید یہ بھی کہا کہ ہم سب کو مل کر ملک اور قوم کی ترقی کے لیے کام کرنا چاہیے، مہنگائی سے نجات حاصل کرنے کے لیے سوچنا چاہیے۔

پاکستان پیپلز پارٹی کے رہنما لطیف کھوسہ کا کہنا یہ بھی ہے کہ اسلامی ریاست میں محترمہ بینظیر بھٹو پہلی خاتون وزیراعظم منتخب ہوئی، پیپلزپارٹی نے ہی خاتون اسپیکر منتخب کرائی، وزیراعظم کے مشیروں کی بے تکی باتوں سے الجھاؤ پیدا ہورہا ہے۔

ذرائع کے مطابق لطیف کھوسہ نے مزید کہا کہ نفرت کی سیاست سے پاکستان کو نقصان ہوگا، ریاست کے لیے جتنی حکومت اہم ہوتی ہے اتنی ہی اپوزیشن بھی اہم ہوتی ہے، حکومت اور اپوزیشن کو افہام تفہیم سے معاملات کو حل کرنا چاہیے۔