وزیراعلیٰ سندھ  سید مراد علی شاہ نے بچوں کو پولیو کے قطرے  پلا  کر سندھ میں پولیو مہم کا افتتاح کیا ہے۔

تفصیلات کے مطابق افتتاحی تقریب گورنمینٹ ڈسپینسری سلطان آباد میں ہوئی ہے۔

وزیراعلیٰ سندھ سید مراد علی شاہ نے تقریب سے خطاب میں کہا کہ یہ پولیو مہم 7 سے 13 جون 2021 تک جاری رہے گی جبکہ سندھ میں اس سال ابھی تک کوئی پولیو کیس نہیں آیا ہے۔

انہوں نے مزید بتایا کہ گزشتہ سال سندھ میں 22 کیسز جبکہ ملک بھر میں 84 کیسز ہوئے تھے جبکہ اس سال بلوچستان میں صرف ایک کیس ہوا ہے۔

مراد علی شاہ نے بتایا کہ یہ مہم سندھ کے 30 اضلاع میں شروع ہوگئی ہے جبکہ صوبے کے 9 ملین بچوں میں 2 ملین بچے کراچی کے ہیں۔

سندھ کے وزیر اعلیٰ کا کہنا تھا کہ پولیو مہم کوویڈ ایس او پیز کے ساتھ ہونی چاہئے اور تمام پولیو ورکرز کو ماسک پہننا اور کام سے پہلے ان کے جسم کا درجہ حرارت لازمی جانچنا  ہے۔

ان کا کہنا تھا کہ کورونا وائرس کی وجہ سے پولیو مہم مارچ سے جولائی 2020 متاثر ہوئی تھی اور مہم متاثر ہونے کی وجہ سے جو بچے رہ گئے ان کو پولیو قطرے اگست 2020 میں دئے گئے تھے۔

مراد علی شاہ نے تقریب میں مزید کہا کہ اب پاکستان کو بھی پولیو سے نجات ہوتی ہوئی نظر آ رہی ہے اگر اس طرح لگن سے پولیو مہم جاری رہی تو پاکستان جلد پولیو فری ملک بن جائے گا جبکہ سندھ کی پولیو کی ہائی رسک یونین کاؤنسل پر مزید توجہ دے رہے ہیں۔

ہائی رسک کراچی کی 8 یوسیز میں بچوں ، ما ؤں کیلئے خاص پروگرام شروع کیا گیا ہے ، ہمیں اپنے بچوں کی صحت کا خاص خیال رکھنا ہے۔

واضح رہے کہ  اس تقریب کے موقع پر وزیر صحت ڈاکٹر عذرا فضل پیچوہو، سیکریٹری صحت کاظم جتوئی ، ای او سی کے سربراہ فیاض عباسی اور دیگر افسران بھی شریک تھے۔