عوامی نیشنل پارٹی کے مرکزی صدر اسفندیارولی خان  نے کہا ہے کہ افغانستان میں جاری خونریزی کا نقصان صرف افغانستان تک محدود نہیں رہے گا۔

تفصیلات کے مطابق عوامی نیشنل پارٹی کے مرکزی صدراسفندیارولی خان  نے اپنے ایک بیان میں کہا کہ پاکستان سمیت تمام اسٹیک ہولڈرز نے کردار ادا نہ کیا تو خونریزی میں مزید اضافہ ہوگا۔

انہوں نے کہا کہ گذشتہ روز بے گناہ افراد کو جس طرح قتل کیا گیا وہ دراصل امن دشمن عوامل کی افغان امن عمل کے خلاف سازش ہے۔

عوامی نیشنل پارٹی افغان حکومت کے ساتھ کھڑی ہے کیونکہ وہ افغانستان کے نمائندے ہیں۔

اسفندیارولی خان  نے یہ بھی کہا کہ بین الافغان مذاکرات سے پہلے جنگ بندی ضروری ہے کیونکہ اگر خونریزی نہیں رکے گی تو امن کیسے قائم ہوگا۔

عوامی نیشنل پارٹی کے مرکزی صدر کا کہنا تھا کہ پاکستان کو کلیدی اور سہولت کار کا کردار ادا کرنا ہوگا ، اب بھی اگر امن کو موقع نہیں دیا گیا تو تباہی سے پورا خطہ نہیں بچ سکے گا۔

انہوں نے کہا کہ پاکستان کو اپنی خارجہ پالیسی پر بھی نظرثانی کرنی ہوگی اورامن کا ساتھ دینا ہوگا۔

اسفندیارولی خان  نے یہ بھی کہا کہ پارلیمانی قرارداد کے مطابق ہم افغان اونڈ، افغان لِڈ مذاکراتی عمل کے ساتھ ہیں، پاکستان کو بھی اس کے ساتھ کھڑا ہونا ہوگا۔

عوامی نیشنل پارٹی کے مرکزی صدر کا کہنا تھا کہ نئے حالات کو مدنظر رکھتے ہوئے پاکستان کو ابھی اپنی پالیسی واضح کرنی ہوگی کیونکہ جنگ چھڑ گئی تو گھر کسی کا نہیں بچے گا۔

انہوں نے کہا کہ امریکی انخلاء کے اعلان کے بعد حملوں میں اضافہ تشویشناک ہے، اے این پی افغانستان کو کسی متشدد فریق کے حوالے کرنے کے خلاف ہے۔

اسفندیارولی خان  نے یہ بھی کہا کہ اس بار اگر امن کا ساتھ نہیں دیا گیا تو جو نقصان ہم پہلے اٹھاچکے ہیں اس سے کئی گنا زیادہ نقصان ہوگا۔

عوامی نیشنل پارٹی کے مرکزی صدر کا کہنا تھا کہ افغان امن عمل میں تمام اسٹیک ہولڈرز کے ساتھ مل کر بھرپور کردار ادا کرنا ہوگا۔

عوامی نیشنل پارٹی کے مرکزی صدر اسفندیارولی خان نے مزید کہا کہ جن ممالک کا کردار بن سکتا ہے وہ امن کیلئے اپنی تاریخی ذمہ داری پوری کریں۔