وزیر اعظم عمران خان نے کہا ہے کہ بین الاقوامی کمپنیوں کا پاکستان میں سرمایہ کاری کیلئے اعتماد بحال ہوا ہے۔

تفصیلات کے مطابق وزیر اعظم عمران خان سے کوکا کولا آئسیک کے وفد کی ملاقات ہوئی جس میں وفد نے وزیراعظم کو کوکا کولا کمپنی کی جانب سے پاکستان میں کی گئی سرمایہ کاری پر بریفنگ دی۔

  سرکاری اعلامیہ کے مطابق وفد نے وزیراعظم کو کمپنی کی پاکستان میں سرمایہ کاری اور مستقبل کی منصوبہ بندی سے آگاہ کرنے کے ساتھ ساتھ انھیں خیبر پختونخوا میں اپنے آئندہ بیوریج پلانٹ کے منصوبے سے بھی آگاہ کیا۔

ملاقات میں وفد نے وزیراعظم کو کوکا کولا آئسیک کی پاکستان میں سرمایہ کاری کی بدولت سماجی و معاشی اثرات پر مرتب کردہ رپورٹ بھی پیش کی۔

کوکا کولا آئسیک کے وفد نے حکومت پاکستان کی جانب سے کمپنی کو سرمایہ کاری میں سہولت فراہم کرنے پر وزیر اعظم کا تہہ دل سے شکریہ ادا کیا۔

اس موقع پر بریفنگ دیتے ہوئے وفد نے وزیراعظم کو بتایا کہ نئے پلانٹ کی بدولت مقامی آبادی کیلئے ملازمت کے بلاواسطہ اور بالواسطہ مواقع پیدا ہوں گے اور اس منصوبے کا سنگ بنیاد عنقریب رکھا جائے گا۔

وفد نے مزید کہا کہ ذیلی صنعتوں کے لئے منافع کے امکانات پیدا ہوں گے اور حکومت پاکستان کے محصولات میں اضافہ ہوگا۔

ملاقات میں وزیراعظم عمران خان نے کوکا کولا آئسیک کی جانب سے پاکستان میں سرمایہ کاری کی حوصلہ افزائی کی  جبکہ وزیراعظم نے ضلع خیبر پختونخوا میں کمپنی کی جانب سے مجوزہ سرمایہ کاری کو بھی سراہا۔

عمران خان نے کہا کہ موجودہ حکومت کی سرمایہ کار دوست پالیسیوں کی بدولت عالمی سرمایہ کار کمپنیوں کا پاکستان میں سرمایہ کاری کے حوالے سے اعتماد بحال ہوا ہے۔

وزیراعظم عمران خان نے مزید کہا کہ مختلف شعبوں میں منافع بخش سرمایہ کاری کے نتیجے میں معاشی ترقی اور روزگار کے بھرپور امکانات روشن ہو رہے ہیں۔

ملاقات میں پاکستان میں ترکی کے سفیر احسان مصطفیٰ یردکل، وزیر صنعت خسرو بختیار اور مشیر تجارت عبدالرزاق داؤد نے شرکت کی جبکہ وفد میں جنرل مینیجر کوکا کولا آئسیک پاکستان ، کوکا کولا پاکستان کے ڈائریکٹر اور کارپوریٹ مینیجرز شامل تھے۔