اپوزیشن لیڈر سندھ اسمبلی حلیم عادل شیخ نے اپنے وڈیو بیان میں کہا کہ دعا ہے جس نے سندھ کو لوٹا اللہ تعالیٰ انہیں تباہ و برباد کرے۔

تفصیلات کے مطابق اپوزیشن لیڈر سندھ اسمبلی حلیم عادل شیخ نے اپنے وڈیو بیان میں کہا کہ آج صبح اٹھے تو پتہ چلا کہ یوم دعا سہیل انور سیال کے کہنے پر منائی جارہی ہے۔

انہوں نے کہا کہ سندھ میں پانی کی قلت تھی پنجاب میں بھی پانی کی قلت تھی، بارشیں کم ہونے اور گلیشئر کے نہ پگھلنے سے پانی کی کمی کا سامنا رہا ہے۔

ذرائع کے مطابق حلیم عادل شیخ نے کہا کہ آج ایک لاکھ 20 ہزار کیوسک پانی گڈو کے مقام پر پہنچ چکا ہے، سندھ حکومت نے وفاق، پنجاب کے خلاف نفرت پھیلانے کے لیے سندھ کارڈ کا شوشہ چھوڑا تھا۔

انہوں نے یہ بھی کہا کہ ان کے خلاف بھی دعا ہونی چاہیے جو گڈو سے کوٹڑی بیراج تک پانی چوری کرتے ہیں، پانی چوری کرکے انور محل بنانے والوں کے خلاف بھی دعا ہونی چاہیے۔

حلیم عادل شیخ نے مزید کہا کہ پیپلزپارٹی نے کبھی سندھ میں ایڈز پھیلنے پر یوم دعا کرائی، کبھی یوم دعا کرائی کہ سندھ کے بچوں کو کتوں نے کاٹ لیا ہے اور تھرپارکر میں ہزاروں بچے بھوک سے نہ مرئیں۔

انہوں نے مزید یہ بھی کہا کہ ایک بارش میں کراچی ڈوب گیا اس پر کبھی یوم دعا کرائی؟ سندھ کے دیگر اضلاع کو سیلاب میں ڈبونے سے بچانے کے لیے کبھی یوم دعا کرائی؟ شہر کراچی کو کچرا کنڈی بنانے والوں کے خلاف دعا کی؟ اس شہر اور صوبے کو تباہ کرنے والی نوسرباز پیپلزپارٹی ہے۔

حلیم عادل شیخ کا کہنا ہے کہ پیپلزپارٹی کی خودساختہ پانی کی قلت کو بے نقاب کریں گے، شوشے چھوڑ کر اپنے ڈاکو روج اور کرپشن کو چھپانے کی کوشش کی جارہی ہے۔

اپوزیشن لیڈر سندھ اسمبلی حلیم عادل شیخ کا کہنا یہ بھی ہے کہ پنجاب سے زیادہ پانی سندھ کو چشمہ سے فراہم کیا گیا یہ نفرت کے ٹوپی ڈرامے ختم ہونے چاہیے، سندھ باسیوں سے گزارش ہے دعا کریں اس نااہل چور کرپٹ سندھ حکومت سے چھٹکارا ملے۔