پاکستانی طالبہ اور سماجی کارکن ملالہ یوسف زئی کے شادی سے متعلق بیان پر تنقید کے بعد ان کے والد کا ردعمل سامنے آگیا ہے۔

 واضح رہے کہ ملالہ یوسف زئی کا برطانوی فیشن میگزین ‘ووگ’ کو دیا گیا انٹرویو متنازع ہوگیا ہے۔

نوبیل انعام یافتہ ملالہ یوسف زئی کے شادی سے متعلق بیان پر سخت تنقید کی جارہی ہے۔

انٹرویو کے دوران ملالہ کا کہنا تھا کہ’ مجھے یہ سمجھ نہیں آتا کہ لوگ شادی کیوں کرتے ہیں؟

ملالہ یوسف زئی نے کہا کہ اگر آپ کسی کو اپنی زندگی کا حصہ بنانا چاہتے ہیں تو اس کے لیے آپ کو شادی کے کاغذات پر دستخط کرنے کی کیا ضرورت ہے؟

انہوں نے کہا کہ یہ ایک پارٹنرشپ کیوں نہیں ہو سکتی؟

خیال رہے کہ پاکستان میں یہ معاملہ ٹوئٹر پر ٹاپ ٹرینڈ میں شامل ہے۔

پشاور کی مشہور مسجد قاسم علی خان کے مفتی شہاب الدین پوپلزئی کی جانب سے ٹوئٹر پر ضیاالدین یوسف زئی کو ٹیگ کرکے سوال کیا ہے۔

محترم مفتی پو پلزئ صاحب
ایسی کوئی بات نہیں۔ میڈیا اور سوشل میڈیا نے انکی انٹرویو کی اقتباس کو سیاق و سباق سے نکال کر تبدیل کرکے اپنی تاویلات کے ساتھ شئیر کیا ہے۔ اور بس۔

— Ziauddin Yousafzai (@ZiauddinY) June 3, 2021

مفتی شہاب الدین پوپلزئی نے ضیاالدین یوسف زئی سے کہا کہ کل سے سوشل میڈیا پرایک خبر زیر گردش ہے کہ آپ کی بیٹی ملالہ یوسف زئی نے رشتہ ازدواج کو یکسر مسترد کرتے ہوئےکہا ہے کہ شادی کرنے سے بہتر ہےکہ پارٹنر شپ کی جائے نہ کہ نکاح۔

 انہوں نے کہا کہ اس بیان سے ہم سب شدید اضطراب میں مبتلا ہیں،آپ وضاحت فرمائیں۔

 مفتی شہاب الدین پوپلزئی  کے سوال کے جواب میں ضیاالدین یوسف زئی کا کہنا تھا کہ ایسی کوئی بات نہیں،میڈیا اور سوشل میڈیا نے انٹرویو کے اقتباس کو سیاق و سباق سے نکال کر اور تبدیل کرکے اپنی تاویلات کے ساتھ شیئرکیا ہے۔