پاکستان رینجرز (سندھ) کی جانب سے کراچی کے نوجوانوں میں صحت مندانہ سرگرمیوں اوراسپورٹس کو فروغ دینے کے لیے محمڈن فٹبال گراؤنڈ پنجاب کالونی میں فٹبال ٹورنامنٹ کا انعقاد کیا گیا  ہے، جس میں شہر بھرسے  32  ٹیموں نے حصہ لیا ہے۔

تفصیلات کے مطابق میچ دیکھنے کے لیے مختلف شعبہ زندگی سے تعلق رکھنے والی اہم شخصیات اور شا ئقین کی بڑی تعداد نے شرکت کی جبکہ فائنل میچ اعظم اسپورٹس کلب اور اُسا مہ اسپورٹس کلب کی ٹیموں کے درمیان کھیلا گیا ہے۔

سنسنی خیز مقابلے کے بعد فاتح ٹیم اعظم اسپورٹس کلب نے ایک صفر سے جیت اپنے نام کی ہے۔

ترجمان رینجرز سندھ کا کہنا ہے کہ فٹبال گراؤنڈ عرصہ دراز سے ایک کوڑے دان کی شکل اختیار کرچکا تھا ، اسےفروری2021 کو بحال کر کے اسپورٹس کمیونٹی کے حوالے کر دیا گیا تھا۔

ڈی جی رینجرز سندھ نے یہ بھی کہا ہے  کہ یہ ہماری ذمہ داری ہے کہ شہر کی بہتری کے لیے اپنا کردار ادا کریں ،  خاص طور پر ایسے ایونٹس کا انعقاد کریں جو نوجوانوں کو صحت مندانہ ماحول فراہم کرتے ہیں۔

ڈی جی رینجرز نے اس ایونٹ کے کامیاب انعقاد پر شرکاء کے ساتھ ساتھ مہمانوں کا بھی شکریہ ادا کیا اور کراچی میں گراس روٹ اسپورٹس ، ثقافتی اور معاشی زندگی کی بحالی کے لیے تعیان جاری رکھنے کا بھی اظہار کیا ہے۔

واضح رہے کہ ٹورنامنٹ کے فائنل میچ کی تقریب کے گیسٹ آف آنر شاہد آفریدی ، معین خان ، جاوید شیخ ،ڈی آئی جی ساؤتھ اور  سیکریٹری اسپورٹز سندھ تھے۔