صوبائی وزیر تعلیم مراد راس نے صوبے میں آٹھویں جماعت کا بورڈ امتحان ختم کرنے کا اعلان کردیا۔

تفصیلات کے مطابق صوبائی وزیر تعلیم مراد راس نے پنجاب اسمبلی کے اجلاس میں صوبے میں تعلیم کی صورتحال حوالے سے آگاہ کرتے ہوئے کہا کہ پانچویں جماعت کے بورڈ امتحانات ختم کرنے کے بعد اب ہم آٹھویں جماعت کا امتحان بھی ختم کرنے جا رہے ہیں۔

صوبائی وزیر تعلیم نے کہا کہ اپوزیشن کی کارکردگی دیکھی جائے تو انہوں نے گزشتہ دس سالوں میں کوئی کام نہیں کیا تھا۔

مراد راس نے یہ بھی کہا کہ اپوزیشن کے دور میں اسکول ایجوکیشن میں ویڈیو کال کا نظام نہیں تھا، ایک ٹیچرز کے ٹرانسفر کیلئے ڈیڑھ لاکھ تک رشوت لی جاتی تھی۔

صوبائی وزیر تعلیم کا کہنا تھا کہ بغیر کوئی رقم خرچ کئے ہم نے ای ٹرانسفر ایپ تیار کی اور ای ٹرانسفر کے ذریعے ہم نے ٹیچرز کے ٹرانسفر کو آسان بنایا۔ آج ٹیچر گھر بیٹھ کر اپنے ٹرانسفر، ریٹائرمنٹ اور اے سی آر کیلئے آن لائن اپلائی کر سکتا ہے۔

مراد راس کا یہ بھی کہنا تھا کہ ہم نے تعلیم گھر کھولا، ایک لاکھ 20 ہزار ٹیچرز رجسٹرڈ کیے، 1200 پہلے اسکول اپ گریڈیشن کیے اور اب 7 ہزار مزید اسکولوں کو اپ گریڈ کرنے جا رہے ہیں۔

صوبائی وزیر تعلیم مراد راس کا مزید کہنا تھا کہ ہم نے 2 ہزار اسکولز میں کلاس روم بنائے، 400 سو ای لائبرییز ہم نے بنائیں، 5 سال بعد جب ہم چھوڑ کر جائیں گئے سارا سسٹم موبائل فونز پر ہوگا۔