وزیرخارجہ مخدوم شاہ محمود قریشی نے کہا ہے کہ پاکستان فلسطینی عوام کے حق خود ارادیت کی جدوجہد کی حمایت کرتا ہے۔

تفصیلات کے مطابق وزیرخارجہ شاہ محمود قریشی نے ترکی میں انطالیہ ڈپلومیسی فورم کے موقع پر فلسطینی وزیر خارجہ ڈاکٹرریاض المالکی سے ملاقات کی جس میں دو طرفہ تعلقات اور خطے کی صورتحال سمیت باہمی دلچسپی کے امور پر تبادلہ خیال کیا گیا۔

اس موقع پر فلسطین کے وزیر خارجہ ڈاکٹر ریاض المالکی نے فلسطین میں امن و امان کی صورتحال کے حوالے سے آگاہ کیا۔

ملاقات میں وزیرخارجہ شاہ محمود قریشی نے فلسطینی ہم منصب کو مسئلہ فلسطین کے پر امن حل کیلئے پاکستان کی جانب سے کی گئی سفارتی کاوشوں سے آگاہ کیا جبکہ وزیرخارجہ نے فلسطین کے مسئلے پر  او آئی سی اور عرب لیگ کی کاوشوں کو بھی سراہا۔

شاہ محمود قریشی نے وزیر اعظم عمران خان پاکستانی قیادت اور عوام کی جانب سے فلسطینی قیادت کے ساتھ یکجہتی کا اظہار کیا۔

وزیر خارجہ نے شرٹ کا تحفہ فلسطینی وزیر خارجہ کو پیش کیا جس پر تحریر تھا “اے ارض، فلسطین میں بھی حاضر ہوں”۔

شاہ محمود قریشی نے کہا کہ فلسطین کا قضیہ مشرق وسطی میں بے چینی کی بنیادی وجہ ہے، پاکستان فلسطینی عوام کے حق خود ارادیت کی جدوجہد کی حمایت کرتا ہے۔

وزیرخارجہ شاہ محمود قریشی نے یہ  بھی کہا کہ پاکستان 1967 سے قبل کی سرحدی صورت حال اور اقوام متحدہ کی قراردادوں کی روشنی میں مسئلہ فلسطین کے دو ریاستی حل کا حامی ہے۔

فلسطینی وزیر خارجہ نے مسئلہ فلسطین کے حوالے سے پاکستان کے واضح، دو ٹوک اور اصولی موقف کو سراہتے ہوئے علاقائی اور عالمی سطح پر پاکستان کی سفارتی معاونت پر پاکستان کی قیادت اور وزیر خارجہ مخدوم شاہ محمود قریشی کا شکریہ ادا کیا۔