مسلم لیگ (ن) کی ترجمان عظمیٰ بخاری نے کہا ہے کہ پنجاب کا بجٹ بھی وفاق سے کچھ مختلف نہیں ہوگا۔

تفصیلات کے مطابق مسلم لیگ(ن) کی ترجمان عظمیٰ بخاری نے اپنے ایک بیان میں کہا کہ عثمان بزدار بجٹ پاس کرانے کے لئے اب لوٹوں اور بلیک میلرز کا سہارا لیں گے۔

مسلم لیگ(ن) کی ترجمان نے کہا کہ عمران خان کا بجٹ سرمایہ داروں اور عثمان بزدار کا بجٹ سہولت کاروں کے لئے ہے، پنجاب کا بجٹ بھی وفاق سے کچھ مختلف نہیں ہوگا۔

عظمیٰ بخاری کا کہنا تھا کہ متعدد مرتبہ کہا جاچکا ہے ان لوٹوں سے ہمارا کوئی تعلق واسطہ نہیں ہے، یہ لوٹے نہ گھر کے ہیں نہ گھاٹ کے، سب لوٹے اور بلیک میلرز عمران خان کو مبارک ہوں۔

مسلم لیگ(ن) کی ترجمان کا یہ بھی کہنا تھا کہ کل تک جہانگیرترین کو بلیک میلر کہنے والے آج ان کے اعزاز میں عشائیے دے رہے ہیں۔

عظمیٰ بخاری نے کہا کہ بزدار صاحب جس طرح تین سال جعلسازی سے پنجاب اسمبلی سے قانون سازی کی اسی طرح جعلسازی سے بجٹ پاس کرالیں۔

عظمیٰ بخاری نے یہ بھی کہا کہ تین سال سے پنجاب اسمبلی کی اسٹینڈنگ کمیٹیاں غیر فعال ہیں، اپوزیشن نے پنجاب کی تمام اسٹینڈنگ کمیٹیوں سے استعفے دیئے ہیں، ہمارے استعفے تو آج بھی اسپیکر پنجاب اسمبلی کی ٹیبل پر پڑے ہیں۔

مسلم لیگ(ن) کی ترجمان عظمیٰ بخاری نے مزید کہا کہ حمزہ شہباز کو پبلک اکاﺅنٹس کمیٹی کا چیئرمین بنانے تک کسی اسٹینڈنگ کمیٹی کا حصہ نہیں بنیں گے۔