سندھ حکومت کے ترجمان بیرسٹر مرتضیٰ وہاب نے کہا ہے کہ اسد عمر حقائق سے لاعلم وزیر ہیں۔

تفصیلات کے مطابق سندھ حکومت کے ترجمان مرتضیٰ وہاب نے وفاقی وزیر اسد عمر کے بیان پر ردعمل دیتے ہوئے کہا کہ اسد عمر سندھ میں وفاق کی جانب سے ترقیاتی منصوبوں سے متعلق حقائق کو مسخ کرنے کی ناکام کوشش کررہے ہیں۔

سندھ حکومت کے ترجمان نے اپنے بیان میں کہا کہ وزیراعلیٰ سندھ نے چھ اسکیموں کی بات کی ہے تو وہ سو فیصد درست ہے۔

مرتضیٰ وہاب نے یہ بھی کہا کہ اسد عمر ایمانداری کا بھاشن دینا چھوڑ دیں، اسد عمر جیسے وزیر ہوا میں بات کرینگے تو دیگر وزراء کا کیا حال ہوگا۔

سندھ حکومت کے ترجمان کا کہنا تھا کہ پی ٹی آئی حکومت نے کراچی کے عوام کو صرف تسلی دینے کے علاوہ کچھ نہیں دیا۔

مرتضیٰ وہاب کا یہ بھی کہنا تھا کہ اس ملک کی بدقسمتی ہے کہ وفاقی وزیر منصوبہ بندی سیاسی بیان بازی پر انحصار کررہا ہے، موصوف نے اپنی ہی حکومت کی قلعی کھول کر رکھ دی ہے۔

سندھ حکومت کے ترجمان نے کہا کہ اسد عمر صاحب! گرین لائن منصوبے کا کریڈٹ لینے کی کوشش نہ کریں۔ گرین لائن کی بسوں کے ٹھیکوں میں کون کونسا ٹھیکیدار ملوث ہے ذرا قوم کو بتائیں۔

مرتضیٰ وہاب نے یہ بھی کہا کہ ہمیں خوشی ہے سلیکٹڈ حکومت پنجاب اور خیبرپختون خوا میں زیادہ منصوبے رکھ رہی ہے مگر سندھ کے عوام کو تعصب کی بھینٹ نہ چڑھایا جائے۔

سندھ حکومت کے ترجمان مرتضیٰ وہاب نے مزید کہا کہ ملکی معیشت میں 70 فیصد روینیو جنریٹ  کرنے والے صوبے کے ساتھ امتیازی سلوک برتا جا رہا ہے۔

واضح رہے اس سے قبل وفاقی وزیر منصوبہ بندی اسد عمر نے اپنے بیان میں کہا تھا کہ سندھ کے ساتھ کوئی امتیازی سلوک نہیں کیا جارہا ہے۔ وزیراعظم عمران خان تعصب کی سیاست نہیں کرتے۔

انہوں نے کہا تھا کہ ملتان، سکھر، موٹروے پرکام پچھلی حکومت نے شروع کیا اور مکمل ہم نے کیا۔ گرین لائن منصوبہ ستمبر تک مکمل ہونے جارہا ہے۔

 وفاقی وزیر منصوبہ بندی اسد عمر نے مزید کہا تھا کہ وزیراعلیٰ سندھ پوائنٹ اسکورنگ کرنا چاہتے ہیں۔ وفاق نے سندھ میں موٹرویز کیلئے 300 ارب روپے جاری کیے لیکن سندھ حکومت نےموٹرویز کیلئے ایک روپیہ خرچ نہیں کیا۔