صوبائی وزیر جنگلات سبطین خان نے کہا ہے کہ لکڑی چوری جیسی سرگرمیوں پر نو ٹالرنس پالیسی اپنائی جائے۔

تفصیلات کے مطابق صوبائی وزیر جنگلات سبطین خان کی زیر صدارت محکمہ جنگلات کا اعلیٰ سطحی اجلاس ہوا جس میں نئے نیشنل پارکس کے قیام کا جائزہ لیا گیا۔

اجلاس میں ٹین بلین ٹری سونامی پروگرام کے تحت ہونے والی شجرکاری کا بھی تفصیلی جائزہ لیا گیا۔

صوبائی وزیر جنگلات سبطین خان نے اجلاس کی صدارت کرتے ہوئے متعلقہ افسران سے سرکاری زمینوں پر شجرکاری کی تفصیلات طلب کرلیں۔

سبطین خان نے کہا کہ جنگلات کی مانیٹرنگ کا نظام مزید موثر کیا جائے۔

وزیر جنگلات نے یہ بھی کہا کہ فاریسٹ گارڈز کو ترجیحی بنیادوں پر جدید سمارٹ فون، موٹر سائیکل اور اسلحہ مہیا کیا جائے۔

سبطین خان نے محکمہ کے افسران کو سوشل میڈیا سے بھرپور استفادہ کرنے کی ہدایات کیں۔

صوبائی وزیر جنگلات سبطین خان نے مزید کہا کہ تمام افسران اپنی ڈومین میں ہونے والی سرگرمیاں سوشل میڈیا کے ذریعے پھیلائیں، سوشل میڈیا کے موثر استعمال سے شجرکاری کی ترغیب بڑے پیمانے پر کی جا سکتی ہے۔

اجلاس میں پارلیمانی سیکرٹری جنگلات، صوبائی سیکرٹری جنگلات، جنوبی اور وسطی پنجاب کے سیکرٹریز، تمام چیف کنزرویٹرز سمیت محکمہ جنگلات کے دیگر سینئر افسران نے شرکت کی۔