وزیراعلیٰ پنجاب سردار عثمان بزدارنے معروف عالم دین مولانا طارق جمیل سے ملاقات کی ہے۔

تفصیلات کے مطابق وزیراعلیٰ پنجاب سردار عثمان بزدار اور معروف عالم دین مولانا طارق جمیل کے درمیان باہمی دلچسپی کے امور، بین المذاہب ہم آہنگی کے فروغ اور دکھی انسانیت کی خدمت کے لئے اقدامات پر بات چیت ہوئی ہے۔

عثمان بزدار نے کہا کہ پنجاب حکومت عام آدمی کی فلاح و بہبود پر پوری طرح فوکس ہے۔

انہوں نے یہ بھی کہا کہ آج تک کسی مخالف کے ساتھ بھی انتقامی کارروائی نہیں کی۔

وزیراعلیٰ پنجاب کا کہنا تھا کہ میرا اور میری حکومت کا مشن دکھی انسانیت کی خدمت ہے کیونکہ دکھی انسانیت کی خدمت میں ہی سکون اوراطمینان ہے

انہوں نے کہا کہ صوبے میں ریسکیو 1122 کا دائرہ کار تحصیل کی سطح تک بڑھایا ہے۔

وزیراعلیٰ پنجاب کا کہنا تھا کہ پنجاب میں ایئر ایمبولینس چلانے کی تجویز زیر غور ہے اور میری خواہش ہے کہ اس تجویز کو جلد از جلد عملی شکل دی جائے۔

انہوں نے کہا کہ ایئر ایمبولینس کے شروع ہونے سے سیلاب ،آتشز دگی اور دیگر قدرتی آفات میں لوگوں کو ریسکیو کرنے میں مدد ملے گی۔

عثمان بزدار نے کہا کہ کورونا وباء کے دوران علمائے کرام کا تعاون لائق تحسین ہے، علماء کرام نے ہر موڑ پر اور ہر مشکل کی گھڑی میں حکومت کی رہنمائی کی ہے۔

وزیراعلیٰ پنجاب کا کہنا تھا کہ انتہا پسندی کے خلاف فکری اور نظریاتی جنگ میں بھی علمائے کرام کا کردار قابل تحسین ہے۔

ملاقات کے دوران مولانا طارق جمیل نے وزیراعلیٰ پنجاب کی قیادت میں پنجاب حکومت کی دکھی انسانیت کی خدمت کے لئے کیے گئے اقدامات کو سراہا۔

معروف عالم دین مولانا طارق جمیل نے خصوصی دعا بھی کی کہ اللہ تعالیٰ آپ کو مزید کامیابیاں عطا فرمائے۔