آرمی چیف جنرل قمر جاوید باجوہ نے کہا ہے کہ پاکستان اور آذربائیجان کی ثقافت، مذہب اور تاریخی لحاظ سے مشترکہ اقدار ہیں۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق آرمی چیف جنرل قمر جاوید باجوہ نے آذربائیجان کا دو روزہ سرکاری دورہ کیا جہاں انہوں نے آذربائیجان کے صدر اور وزیر دفاع سے ملاقات کی۔

آئی ایس پی آر کے مطابق ملاقاتوں میں باہمی دلچسپی امور، خطے کی سیکیورٹی صورتحال پر بات چیت کی جبکہ افغان امن عمل کی حالیہ پیش رفت، دو طرفہ دفاع اور سیکیورٹی تعاون سے متعلق امور پر بھی تبادلہ خیال کیا۔

آئی ایس پی آر کا کہنا ہے کہ آذربائیجان کے صدر اور وزیر دفاع نے تمام عالمی فورمز پر پاکستان کی حمایت کا شکریہ ادا کیا۔

اس موقع پر آرمی چیف جنرل قمر جاوید باجوہ نے کہا کہ پاکستان اور آذربائیجان کی ثقافت، مذہب اور تاریخی لحاظ سے مشترکہ اقدار ہیں، دونوں ممالک کے پاس جیو اسٹریٹجک اہمیت، دو طرفہ تعاون سے مشترکہ فائدہ اٹھانے کے وسیع مواقع موجود ہیں۔

آرمی چیف جنرل قمر جاوید باجوہ نے  مزید کہا کہ پاک فوج دونوں ممالک کے مابین فوجی تعاون کو مزید فروغ دینے کی خواہاں ہے۔

قبل ازیں آذربائیجان میں آرمی چیف جنرل قمر جاوید باجوہ کا پرتپاک استقبال کیا گیا ، وزارت دفاع آمد پر چاک و چوبند فوجی دستے نے آرمی چیف جنرل قمر جاوید باجوہ کو گارڈ آف آنر پیش کیا تھا۔