کینیڈا میں سائنس دانوں نے کورونا مریضوں میں آکسیجن کی کمی کی وجہ معلوم کر لی ہے۔

تفصیلات کے مطابق اس سلسلے میں نئی طبی تحقیق سامنے آ گئی ہے جس میں ایرانی نژاد مسلمان سائنس دان نے اس سلسلے میں کلیدی کردار ادا کیا ہے۔

تحقیق کے دوران طبی ماہرین کی ٹیم نے کورونا وائرس سے متاثرہ 128 مریضوں کا معائنہ کیا جن میں شدید بیمار، کم بیمار اور معمولی علامات والے افراد سب شامل تھے۔

جریدے اسٹیم سیل رپورٹس میں شائع شدہ نئے طبی مطالعے میں مرکزی مصنف ایسوسی ایٹ پروفیسر شکر اللہ الہٰی نے کہا ہے کہ خون میں آکسیجن کی کمی کو وِڈ 19 کے مریضوں کے لئے ایک بڑا مسئلہ ہے اور ہمارے نزدیک اس کی ایک ممکنہ وجہ یہ ہو سکتی ہے کہ کورونا وائرس انسانی جسم میں خون کے سرخ خلیات کی پیدوار کو متاثر کرتا ہے۔

ریسرچ میں دیکھا گیا کہ جیسے ہی کورونا وائرس کی وجہ سے مرض کی شدت میں اضافہ ہوتا ہے، خون میں اُن سرخ خلیات کا سیلاب امڈ آتا ہے جو ابھی پوری طرح سے بنے نہیں ہوتے، اور بعض اوقات خون میں موجود خلیوں کی کُل تعداد میں ان کا تناسب  60 فیصد تک پہنچ جاتا ہے، جب کہ صحت مند آدمی کے خون میں اس کا تناسب 1 فی صد یا بالکل نہیں ہوتا۔

انہوں نے کہا کہ خون کے یہ خام خلیے آکسیجن منتقل نہیں کرتے، اور انھیں کورونا وائرس کا شدید خطرہ بھی لاحق ہوتا ہے، جب کرونا وائرس خون کے ان خام سرخ خلیوں کو حملے میں تباہ کر دیتا ہے، تو جسم ان کی جگہ خون کے مکمل سرخ خلیے (جن کی عمر 120 روز سے زیادہ نہیں ہوتی) نہیں لا پاتا، اس طرح خون میں آکسیجن منتقل کرنے کی صلاحیت ماند پڑ جاتی ہے۔

شکر اللہ الہٰی کے مطابق ان کی ٹیم کی تحقیق سے 2 اہم نتائج سامنے آئے جس میں پہلا یہ کہ کورونا وائرس سے خون کے نامکمل سرخ خلیے متاثر ہوتے ہیں، جب وائرس ان خلیوں کو مار دیتا ہے تو پھر انسانی جسم ہڈیوں کے مغز سے مزید نامکمل سرخ خلیوں کو کھینچ کر مطلوبہ آکسیجن کی رسد پوری کرنے پر مجبور ہو جاتا ہے، تاہم اس سے محض وائرس کے لئے مزید اہداف ہی جنم لیتے ہیں ،دوسرا یہ کہ خون میں نامکمل سرخ خلیے درحقیقت طاقت ور ’امیونو سپریسیو سیلز‘ ہوتے ہیں، جو انسانی جسم میں اینٹی باڈیز کی تیاری کو دبا دیتے ہیں اور کورونا وائرس کے خلاف خلیوں کی مدافعت کو بھی کچل دیتے ہیں، اس کے نتیجے میں انسان کی حالت خراب ہو جاتی ہے۔