وزیر صحت ڈاکٹر یاسمین راشد نے کہا ہے کہ کورونا وائرس پوری دنیا کیلئے ایک نیا چیلنج ہے۔

تفصیلات کے مطابق صوبائی وزیر صحت ڈاکٹر یاسمین راشد اور چیف سیکرٹری پنجاب کی سول سیکرٹریٹ کے دربار ہال میں پولیو اوورسائٹ بورڈ کے وفد سے اہم ملاقات ہوئی جس میں وفد نے پولیو کے خاتمے کیلئے پنجاب حکومت کی جانب سے کئے جانے والے اقدامات کو سراہا۔

ملاقات میں صوبائی وزیر صحت ڈاکٹر یاسمین راشد اور وفد کے درمیان پنجاب میں پولیوکے مکمل تدارک کیلئے موجودہ حکمت عملی اور آئندہ لائحہ عمل پرتبادلہ خیال ہوا۔

اس موقع پر ڈاکٹر یاسمین راشد نے صوبے بھر میں پولیو کے تدارک کیلئے اٹھائے گئے اقدامات کی تفصیلات شیئر کیں۔

صوبائی وزیر صحت ڈاکٹر یاسمین راشد نے اظہارخیال کرتے ہوئے کہا کہ وزیراعظم عمران خان اور وزیر اعلیٰ پنجاب سردارعثمان بزدار کے ویژن کے مطابق پنجاب کو پولیوفری بنانے کیلئے کوشاں اور پرعزم ہیں۔

ڈاکٹر یاسمین راشد نے کہا کہ پنجاب میں پولیو کے تدارک کیلئے تمام تروسائل بروئے کارلائے جارہے ہیں، پنجاب میں پولیو کے تدارک کیلئے تعاون کرنے پر عالمی ادارہ صحت اور یونیسف کا شکریہ اداکرتے ہیں۔

صوبائی وزیر صحت کا کہنا تھا کہ پنجاب میں انتظامیہ انسدادپولیو مہم کو کامیاب بنارہی ہے، انسداد پولیو مہم کے دوران ہزاروں ٹیمیں تشکیل دے کر ہدف کو حاصل کیاجاتا ہے۔

 ڈاکٹر یاسمین راشد کا یہ بھی کہنا تھا کہ انسداد پولیو مہم میں لیڈی ہیلتھ ورکرز کا کردار انتہائی اہم ہے، پنجاب کے بچوں کو پولیو بیماری کا شکار نہیں ہونے دینگے۔

صوبائی وزیر صحت ڈاکٹر یاسمین راشد کا مزید کہنا تھا کہ کوروناوائرس پوری دنیاکیلئے ایک نیاچیلنج ہے،کوروناوائرس کے ساتھ ساتھ پولیو اور ڈینگی سے بھی نبرآزما ہیں۔

اس موقع پر چیف سیکرٹری پنجاب نے کہا کہ پولیو کا خاتمہ قومی مقصد ہے، قومی مقصد کے حصول کیلئے پنجاب اپنا کردار ادا کر رہا ہے۔

چیف سیکرٹری پنجاب نے یہ بھی کہا کہ پنجاب میں پولیو ٹیموں کو مکمل تحفظ فراہم کیا جاتا ہے، پولیوکے تدارک کیلئے تمام سٹیک ہولڈرز مل کرکام کررہے ہیں۔

چیف سیکرٹری پنجاب نے مزید کہا کہ پنجاب میں پولیوکے خاتمہ کیلئے کوششوں کو تیز کردیا گیا ہے، صوبہ میں انسداد پولیو مہم کو بھرپور انداز میں مربوط حکمت عملی کے تحت جاری رکھا جائے گا۔