کورونا وائرس کی موجودہ صورتحال کے پیش نظر کاروبار کے حوالے سےصوبائی وزیر سعید غنی نے تاجروں کے لئے خوشخبری کا اعلان کردیا ہے۔

تفصیلات کے مطابق وزیرتعلیم سندھ سعید غنی نے اپنے ایک بیان میں کہا کہ سندھ میں حالات بہتر ہیں، ایک سے دو روز میں کاروبار رات 8بجے تک کھولنے کا اعلان کردیا جائے گا۔

اپنے بیان میں سعید غنی نے عوام اور تاجروں سے ویکسین لگوانے کی اپیل کردی۔

سعید غنی نے کہا کہ اب ہم چیزیں کھولنے کی طرف جارہے ہیں،عوام کے تعاون کے بغیر کام نہیں ہو سکتا۔

وزیر تعلیم سندھ کا کہنا تھا کہ دباؤ ڈالنے والے خود دباؤ میں ہیں ، وفاقی حکومت نے اپنی غلطیوں اور زیادتیوں کا اعتراف بھی کھل کر کیا ہے اور اقدامات بھی بتائے۔

سعید غنی کا یہ بھی کہنا تھا کہ پچھلے برس وفاقی حکومت کو بجلی بلز کم کرنے سمیت دیگر تجاویز دیں مگر وفاقی حکومت نے کچھ نہیں کیا۔

وزیر تعلیم سندھ سعید غنی کا مزید کہنا تھا کہ وفاقی حکومت سے مشاورت کے بعد کاروباری اوقات کار کا اعلان کریں گے۔

دوسری جانب وزیراعلیٰ سند مراد علی شاہ کی زیر صدارت کورونا ٹاسک فور س کا اجلاس منعقد ہوا جس میں وزیراعلیٰ سندھ سید مراد علی شاہ کی جانب سے سرکاری ملازمین کے ویکسین نہ لگوانے پر تنخواہ بند کرنے کے احکامات جاری کردیئے گئے ہیں۔۔

وزیراعلیٰ سندھ نے کی جانب سے اجلاس کے دوران لوگوں کو شناختی کارڈ لے کر ویکسینیشن سینٹرز پر ویکسین لگوانے کی اپیل کی گئی ہے۔

اجلاس کے دوران وزیراعلیٰ سندھ نے محکمہ خزانہ کو ہدایات جاری کی ہیں کہ جو سرکاری ملازم ویکسین نہیں لگوائے گا اس کی جولائی سے تنخواہ بند کی جائے۔