وزیر خزانہ شوکت ترین نے کہا ہے کہ برآمدات میں اضافہ موجودہ حکومت کی اولین ترجیح ہے۔

ترجمان وزارت خزانہ کے مطابق وزیر خزانہ شوکت ترین کی چینی سفیر نونگ رونگ سے ملاقات ہوئی جس میں پاک چین اقتصادی تعاون، سی پیک، سرمایہ کاری پر بات چیت کی گئی۔

 ملاقات میں چینی سفیر نونگ رونگ نے وزیر خزانہ کو سی پیک کے جاری منصوبوں پر بریفنگ دی۔

نونگ رونگ نےکہا کہ چینی حکومت اور کمپنیاں پاکستان میں سرمایہ کاری میں حائل رکاوٹیں دور کرنے میں مدد کے لیے تیار ہے۔

چینی سفیر نونگ رونگ نے مزید کہا کہ چین پاکستان میں معاشی سرگرمیوں کے فروغ کے لیے مزید اقدامات اٹھانے کو تیار ہے۔

اس موقع پر وزیر خزانہ شوکت ترین نے کہا کہ پاکستان چینی کمپنیوں کی سرمایہ کاری کو خود آمدید کہتا ہے، دو طرفہ اقتصادی تعلقات میں اضافے کے بے پناہ مواقع موجود ہیں۔

وزیر خزانہ نے کہا کہ بجٹ میں حکومت نے پائیدار معاشی ترقی پر توجہ دی ہے۔

شوکت ترین نے یہ بھی کہا کہ حکومت غیر ملکی سرمایہ کاری کے فروغ کے لئے کوشاں ہے، چینی سرمایہ کاروں کے لئے پاکستان میں زراعت اور صنعت میں مواقع موجود ہیں۔

وزیر خزانہ شوکت ترین نے مزید کہا کہ پورے خطے میں معاشی ترقی کے لئے اقدامات کی ضرورت ہے، چینی سرمایہ کاروں کو پاکستان میں ہر ممکن سہولت فراہم کی جائے گی۔