موسم گرما آتے ہی جلد بھی مرجھا جاتی ہے ،چکنی سے نارمل جِلد رکھنے والے افراد کے لئے ایکنی، کیل مہاسوں اور دانوں کی شکل میں یہ موسم مزید مشکلات پیدا کر دیتا ہے لیکن اب اس سے باآسانی چھٹکارہ حاصل کیا جا سکتا ہے۔

ماہرین کے مطابق صاف شفاف اور بے داغ جلد حاصل کرنے کے لئے سب سے پہلے تو زیادہ سے زیادہ پانی پینا ہے اور اپنے چہرے سمیت پورے جسم کی جلد کی صفائی کا خیال رکھنا ہےاس کے بعد جو چہرے پر دانے، کیل مہاسے اور ان کے نتیجے میں بد نما داغوں کا آغاز ہو تا ہے تو پھر یہ معاملہ سنجیدہ ہے اور اس کا حل ضروری ہے۔

بس موسم گرما کے آتے ہی مندرجہ ذیل بتائے گئے، کیمیکل سے پاک گھر ہی میں با آسانی دستیاب اجزاء سے تیار کردہ فیس ماسک کا استعمال کر کے مہنگی کریموں اور اُن کے سائیڈ افیکٹس، کیل مہاسوں اور اضافی چکنائی سے جان چھڑائی جا سکتی ہے۔

گھر میں روز مرہ کی زندگی میں استعمال ہونے والی چیزوں سے ہی کیسے اپنی جلد کو بہتر بنا سکتے ہیں یہ مرد اور خواتین دونوں کے لئے ہے۔

پروٹین حاصل کرنے کے لئے انڈہ بہترین آپشن ہے، انڈے کی مدد سے ایکنی سے خراب، پھٹی اور سوجی ہوئی جلد اور اس پر بنے زخموں کو بھرنے میں مدد ملتی ہے اور ایکنی کا خاتمہ ہوتا ہے۔

سب سے پہلے انڈے کی سفیدی میں شہد اور لیموں کا رس ملا لیں، اب اسے اپنے صاف چہرے پر لگائیں اور خشک ہونے پر دھولیں، شہد میں اینٹی بیکٹیریل خصوصیات پائی جاتی ہیں جو کہ ایکنی کے سبب بننے والے بیکٹیریاز کا خاتمہ کرتی ہے اور لیموں اسکن سے داغ دھبے مٹا کر اسے گورا بناتا ہے اس کے علاوہ یہ ماسک آئلی اسکن والوں کے لئے گرمیوں میں ایک تحفہ سمجھا جاتا ہے۔

ٹماٹر میں قدرتی طور پر وٹامن سی اور اے بھاری مقدار میں پائے جاتے ہیں، ٹماٹر کے چند دنوں کے استعمال سے رنگ گورا اور ضدی داغ دھبے صاف ہو جاتے ہیں ،آدھا ٹماٹر کاٹ کر اسے میش کر کے چہرے اور گردن پر لگائیں اور 15 منٹ بعد دھولیں، اچھے نتائج کے لئے اس میں ایلوویرا یا لیموں بھی ملایا جا سکتا ہے۔

ہلدی، بیسن، دہی، لیموں اور عرق گلاب  تمام اجزاء ایک ایک چمچ لے لیں اور اچھی طرح مکس کرلیں، اب اس پیک کو چہرے پر لگائیں اور سوکھنے پر اسے ٹھنڈے پانی سے دھو لیں۔

ایک پیالے میں تین چمچ مالٹے کے چھلکوں کا پاؤڈر  لے لیں اور اس میں دو چمچ بیسن اور لیموں کا رس شامل کر لیں، تینوں چیزوں کو اچھی طرح مکس کر لیں یہاں تک کہ ایک دانے دار پیسٹ بن جائے، اس ہی پیسٹ میں دو چمچ عرق گلاب بھی شامل کر سکتے ہیں کیونکہ یہ جلد کو تازگی اور رعنائی بخشتا ہے ،اس پیسٹ کو چہرے پر بیس منٹ تک لگا رہنے دیں اور خشک ہو نے پرٹھنڈے پانی سے دھو لیں، بہترین نتائج کے لئے اس ماسک کو ہفتے میں تین بار استعمال کریں۔

ان چند فیس ماسک کو اپنی روز مرہ کی زندگی میں شامل کر کے اپنی جلد کو کم وقت میں خوبصورت بنایا جا سکتا ہے۔