ترجمان دفتر خارجہ زاہد حفیظ چوہدری نے کہا کہ بیرون ملک 5 پاکستانی سفارتخانوں میں وزیر خارجہ پورٹل کا آغاز کردیا گیا ہے۔

تفصیلات کے مطابق ترجمان دفتر خارجہ زاہد حفیظ چوہدری نے کہا کہ پہلے مرحلہ میں ایف ایم پی 5 ممالک میں رہنے والے اوورسیز پاکستانیوں کو آن لائن دستیاب ہو گا۔

انہوں نے یہ بھی کہا کہ ان 5 ممالک میں بارسلونا، دبئی، جدہ، لندن اور نیویارک شامل ہیں۔ اوورسیز پاکستانی اسکا ایپ ڈاؤن لوڈ کر کے اپنے مسائل اور شکایات درج کراسکتے ہیں، پورٹل کا مقصد سمندر پار پاکستانیوں کے مسائل ترجیحی بنیادوں پر حل کرنا ہے۔

وزارت خارجہ نے بیرون ممالک میں مقیم پاکستانیوں کے لیے بڑے اقدامات کیے ہیں، بیرون ممالک 5 پاکستانی مشنز میں وزیر خارجہ نے پورٹل کا آغاز کیا ہے۔

ترجمان دفتر خارجہ نے مزید کہا کہ ویژن ایف او کے تحت وزیر خارجہ پورٹل کا تجرباتی مرحلہ شروع کیا گیا، اس کے ابتدائی مرحلے میں ایف ایم پی بیرون ملک مقیم پاکستانیوں اور بیرون ملک مقیم 5 پاکستانی مشنوں یعنی وزیر خارجہ پورٹل کا آغاز دبئی، بارسلونا، جدہ، لندن اور نیو یارک میں کیا گیا۔

انہوں نے مزید یہ بھی کہا کہ بیرون ممالک میں مقیم پاکستانی اور غیرملکی شہری آج سے اپنے مسائل اور تجاویز بھیج سکیں گے، وزیر خارجہ پورٹل ایپ انڈرائڈ سٹور سے ڈاؤن لوڈ کی جا سکتی ہے، بیرون ممالک میں مقیم پاکستانی بزریعہ ایپ براہ راست مشنز کے ساتھ منسلک ہو جائیں گے۔

ترجمان دفتر خارجہ زاہد حفیظ چوہدری کا کہنا یہ بھی ہے کہ بیرون ممالک میں مقیم پاکستانیوں کے مسائل کی آگہی اور جلد حل میں مدد ملے گی، وزیر خارجہ پورٹل کو جلد پاکستانی مشنز تک بڑھا دیا جائے گا۔